ചെന്നൈ: വെള്ളിത്തരയിലെ മിന്നും താരങ്ങളായ പലരുടേയും ഓഫ് സ്‌ക്രീന്‍ ചിത്രങ്ങള്‍ പുറത്തു വരുമ്പോള്‍ അത് സോഷ്യല്‍ മീഡിയ ഇരു കൈയ്യും നീ്ട്ടി സ്വീകരിക്കാറുണ്ട്. അത്തരത്തിലൊരു താരത്തിന്റെ ചിത്രമാണ് ഇപ്പോള്‍ സോഷ്യല്‍ മീഡിയയില്‍ വൈറലായി മാറിയിരിക്കുന്നത്. ചിത്രത്തിലെ താരം മോഹന്‍ലാലാണ്. ചിത്രത്തിന്റെ പ്രത്യേകത എന്താണെന്നല്ലേ? മോഹന്‍ലാലെന്ന താരം എത്ര സിമ്പിളാണെന്നതിന്റെ തെളിവാണ് ഈ ചിത്രങ്ങള്‍.
തന്റെ പുതിയ ചിത്രമായ ഒടിയനു വേണ്ടി മോഹന്‍ലാല്‍ തടി കുറയ്ക്കുവെന്ന് നേരത്തെ റിപ്പോര്‍ട്ടുകളുണ്ടായിരുന്നു. അതിനു വേണ്ടി ചെന്നൈയിലെ അപ്പോളോ ആശുപത്രിയിലെത്തിയ മോഹന്‍ലാല്‍ ഒ.പിയിലെ ക്യൂവില്‍ നില്‍ക്കുന്നതാണ് ചിത്രങ്ങള്‍. ചിത്രത്തിന് വേണ്ടി തടി കുറയ്ക്കുന്നതിന് മുന്നോടിയായി നടത്തേണ്ട സാധാരണ ചെക്ക് അപ്പുകള്‍ക്കായാണ് മോഹന്‍ലാല്‍ ഒ.പിയിലെത്തിയത്. ദക്ഷിണേന്ത്യയിലെ തന്നെ ഏറ്റവും വലിയ താരങ്ങളിലൊരാളായ മോഹന്‍ലാല്‍ താരജാഡകളൊന്നുമില്ലാതെ ക്യൂവില്‍ നില്‍ക്കുകയായിരുന്നു. ക്യൂവില്‍ നില്‍ക്കുകയായിരുന്ന താരത്തെ തിരിച്ചറിഞ്ഞ ആശുപത്രി അധികൃതര്‍ അവിടെ എത്തി അദ്ദേഹത്തെ കൂട്ടികൊണ്ടു പോവുകയായിരുന്നു.
ശരീരഭാരം കുറയ്ക്കുന്നതിന് ശരീരം തയ്യാറാണോ എന്നറിയാനാണ് താരം ചെക്ക് അപ്പുകള്‍ നടത്തിയത്. വ്യായമത്തിലൂടെ ഹൃദയത്തിന്റെ പ്രവര്‍ത്തനം മനസിലാക്കുന്ന ട്രെഡ്മില്‍ ടെസ്റ്റിനും മോഹന്‍ലാല്‍ വിധേയനായതയാണ് വിവരം.
നേരത്തെ ഫ്രാന്‍സില്‍ നിന്നുമുള്ള 25 സംഘം മോഹന്‍ലാലിനെ ശരീരഭാരം കുറയ്ക്കാന്‍ സഹായിക്കാനായി എത്തിയതായി സംവിധായകന്‍ ശ്രീകുമാര്‍ മേനോന്‍ അറിയിച്ചിരുന്നു. ശ്രീകുമാര്‍ സംവിധാനം ചെയ്യുന്ന ഒടിയന്‍ മലയാള സിനിമ കണ്ട ഏറ്റവും വലിയ ബ്രഹ്മാണ്ഡ ചിത്രങ്ങളിലൊന്നായിരിക്കും.