ന്യൂദല്‍ഹി: മോദിയുടെ സാമ്പത്തിക നയത്തെച്ചൊല്ലി ആര്‍.എസ്.എസും ബി.ജെ.പിയും തമ്മിലുള്ള പോര് മുറുകുന്നു. മോദി സര്‍ക്കാരും ബി.ജെ.പിയും ഒരുവശത്തും ആര്‍.എസ്.എസും സ്വദേശി ജാഗരണ്‍ മഞ്ചും ബി.എം.എസും മറുവശത്തുമായാണ് പോര് നടക്കുന്നത്.
വാജ്പേയി സര്‍ക്കാരിന്റെ കാലത്ത് വിദേശ മുതല്‍മുടക്ക് ഉള്‍പ്പെടെയുള്ള ഉദാരവത്കരണ നടപടികളുടെ പേരില്‍ സര്‍ക്കാരും സംഘപരിവാറുമായുണ്ടായ ഏറ്റുമുട്ടലിനു സമാനരീതിയിലാണ് ഇപ്പോഴുള്ള പോര്. സംഘപരിവാറിന് പാര്‍ട്ടിക്കും സര്‍ക്കാരിനും മേല്‍ സ്വാധീനം കുറഞ്ഞിട്ടുണ്ടെന്ന് സംഘപരിവാര്‍ വൃത്തങ്ങള്‍ക്ക് അഭിപ്രായമുണ്ട്.
വാജ്പേയി സര്‍ക്കാരിന്റെ കാലത്ത് പാര്‍ട്ടി നേതൃനിരയിലുള്ളവര്‍ സ്വദേശി അനുഭാവമുള്ളവരായിരുന്നുവെന്നും എന്നാല്‍ ഇന്ന് അതല്ല സ്ഥിതിയെന്നും അതുകൊണ്ടാണ് അവഗണിക്കപ്പെടുന്നതെന്നും സംഘപരിവാര്‍ വൃത്തങ്ങള്‍ പറയുന്നു.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
മേഖലാ സമഗ്ര സാമ്പത്തിക പങ്കാളിത്ത കരാര്‍ സംബന്ധിച്ചാണ് പുതിയ തര്‍ക്കം. നോട്ടുനിരോധനം, പൊതുമേഖലാ സ്ഥാപനങ്ങളുടെ ഓഹരി വില്‍പന, ബാങ്കുകളുടെ ലയനം തുടങ്ങിയവയെ സ്വദേശി ജാഗരണ്‍ മഞ്ച് ചോദ്യം ചെയ്തിരുന്നു. നോട്ട് നിരോധനത്തിന് നിലവിലെ സാമ്പത്തിക മാന്ദ്യത്തില്‍ പങ്കുണ്ടെന്നും അവര്‍ പറഞ്ഞിരുന്നു.
