തൊടുപുഴ: കടുത്ത അര്‍ജന്റൈന്‍ ആരാധകനാണ് സി.പി.ഐ.എം നേതാവും മുന്‍ മന്ത്രിയുമായ എം.എം. മണി. അര്‍ജന്റീനക്കും മെസിക്കും വേണ്ടി തന്റെ പാര്‍ട്ടിയിലുള്ളവരോട് പോലും മണിയാശാന്‍ വെല്ലുവിളികള്‍ നടത്താറുണ്ട്.
ഖത്തര്‍ ലോകകപ്പില്‍ ഗ്രൂപ്പ് ഘട്ടത്തിലെ ആദ്യ മത്സരത്തില്‍ തന്നെ സൗദിയോട് അര്‍ജന്റീന പരാജയപ്പെട്ടപ്പോള്‍ ‘കളി ഇനിയും ബാക്കിയാണ് മക്കളെ’ എന്നാണ് എം.എം. മണി ഫേസ്ബുക്കില്‍ കുറിച്ചിരുന്നത്.
മണിയാശാന്റെ വാക്കുകള്‍ സത്യമായി പിറന്നിരിക്കുകയാണ് തുടര്‍ന്ന് എല്ലാം മത്സരങ്ങളും വിജയിച്ച് ഗ്രൂപ്പ് ഘട്ടവും നോക്കൗട്ടും കടന്ന് അര്‍ജന്റീന ഫൈനലില്‍ എത്തിയിരിക്കുകയാണ്.
ഞായറാഴ്ച ഇന്ത്യന്‍ സമയം രാത്രി 8:30ന് ലുസൈല്‍ സ്റ്റേഡിയത്തില്‍ വെച്ചാണ് അര്‍ജന്റീന കലാശപ്പോരാട്ടത്തില്‍ ഫ്രാന്‍സിനെ നേരിടുന്നത്. ഈ സമയത്ത് തന്റെ ഫേസ്ബുക്ക് പോസ്റ്റിലൂടെ വെല്ലുവിളിയുമായി എത്തിയിരിക്കുകയാണ് എം.എം. മണി. ഫ്രഞ്ച് സൂപ്പര്‍ താരം കിലിയന്‍ എംബാപ്പെയുടെ പേര് പറഞ്ഞാണ് എം.എം. മണിയുടെ പോസ്റ്റ്.
