നിങ്ങളോട് അനുമതി ചോദിക്കുകയല്ല, പോസ്റ്റുമാനെപ്പോലെ ആ ബില്ല് രാഷ്ട്രപതിക്കയച്ചാല്‍ മതി: സ്റ്റാലിന്‍
ഡൂള്‍ന്യൂസ് ഡെസ്‌ക്
Tuesday, 26th April 2022, 4:29 pm
ചെന്നൈ: ഗവര്‍ണര്‍ക്കെതിരെ ആഞ്ഞടിച്ച് തമിഴ്‌നാട് മുഖ്യമന്ത്രി എം.കെ. സ്റ്റാലിന്‍.
നീറ്റ് വിരുദ്ധ ബില്ലിനെച്ചൊല്ലിയാണ് ഗവര്‍ണര്‍ ആര്‍.എന്‍. രവിക്കെതിരെ അദ്ദേഹം രൂക്ഷമായ വിമര്‍ശനം ഉന്നയിച്ചത്. സംസ്ഥാനം ബില്ലിന് ഗവര്‍ണറുടെ അംഗീകാരം ചോദിക്കുകയല്ല, ഒരു ‘പോസ്റ്റ്മാനെ’ പോലെ രാഷ്ട്രപതിയുടെ അംഗീകാരത്തിനായി അയച്ചാല്‍ മതിയെന്ന് സ്റ്റാലിന്‍ പറഞ്ഞു.
ഡി.എം.കെ ഭരണകാലത്ത് രണ്ടുതവണ നിയമസഭയില്‍ പാസാക്കിയ ബില്ലിന് അംഗീകാരം നല്‍കാന്‍ ഗവര്‍ണര്‍ക്ക് അധികാരമില്ലെന്നും തമിഴ്നാടിനുള്ള ദേശീയ എന്‍ട്രന്‍സ് കം എലിജിബിലിറ്റി ടെസ്റ്റിന്റെ (നീറ്റ്) പരിധിയില്‍ നിന്ന് ഒഴിവാക്കണമെന്നും അദ്ദേഹം പറഞ്ഞു.
”ബില്ലിന് ഗവര്‍ണറോട് അനുമതി ചോദിക്കുകയല്ല ഞങ്ങള്‍. ഗവര്‍ണര്‍ക്ക് അതിനുള്ള അധികാരമില്ല. ഞങ്ങള്‍ ആവശ്യപ്പെടുന്നത് ബില്‍ രാഷ്ട്രപതിക്ക് അയക്കണമെന്നാണ്,” അദ്ദേഹം പറഞ്ഞു.
