ചെന്നൈ: കച്ചത്തീവ് ദ്വീപ് തര്‍ക്കവുമായി ബന്ധപ്പെട്ട വിവാദത്തിനിടെ, തമിഴ്നാട് മുഖ്യമന്ത്രി എം.കെ സ്റ്റാലിന്‍ പ്രധാനമന്ത്രി നരേന്ദ്ര മോദിക്കെതിരെ ആഞ്ഞടിച്ചു. ഇ.ഡിക്കും ആദായനികുതി വകുപ്പിനും ശേഷം തന്റെ സഖ്യത്തില്‍ വിവരാവകാശ നിയമത്തെയും ചേര്‍ത്തുവെന്ന് ആരോപിച്ചു.
‘എന്‍ഫോഴ്സ്മെന്റ് ഡയറക്ടറേറ്റും (ഇ.ഡി) ആദായനികുതിയും (ഐ.ടി) തന്റെ സഖ്യത്തില്‍ ആര്‍.ടി.ഐയും ഉള്‍പ്പെടുത്തിയിട്ടുണ്ട്. താന്‍ എന്തെങ്കിലും പറഞ്ഞാല്‍ ആളുകള്‍ വിശ്വസിക്കില്ലെന്ന് മോദിക്ക് അറിയാവുന്നതിനാല്‍, അദ്ദേഹം വിവരാവകാശ നിയമത്തെ ഗിമ്മിക്കുകള്‍ക്കായി ഉപയോഗിക്കുന്നു,’ സ്റ്റാലിന്‍ പറഞ്ഞു. കച്ചത്തീവിനെക്കുറിച്ച് പ്രധാനമന്ത്രി എന്തിനാണ് ഉത്തര്‍പ്രദേശില്‍ സംസാരിക്കേണ്ടതെന്നും സ്റ്റാലിന്‍ ചോദിച്ചു.
തന്ത്രപ്രധാനമായ ദ്വീപ് 1974ല്‍ ശ്രീലങ്കയ്ക്ക് കൈമാറാനുള്ള അന്നത്തെ പ്രധാനമന്ത്രി ഇന്ദിരാഗാന്ധിയുടെ സര്‍ക്കാരിന്റെ തീരുമാനത്തെക്കുറിച്ചുള്ള വിവരാവകാശ റിപ്പോര്‍ട്ടിനെത്തുടര്‍ന്ന് കച്ചത്തീവ് ദ്വീപ് വിവാദത്തില്‍ പ്രധാനമന്ത്രി മോദി ഞായറാഴ്ച കോണ്‍ഗ്രസിനെ രൂക്ഷമായി വിമര്‍ശിച്ചതിന് പിന്നാലെയാണ് സ്റ്റാലിന്റെ രൂക്ഷമായ പരാമര്‍ശം.
സാമൂഹിക നീതിയും സമത്വവും നിലനില്‍ക്കണമെങ്കില്‍ വരുന്ന ലോക്സഭാ തെരഞ്ഞെടുപ്പില്‍ ബി.ജെ.പിയെ പരാജയപ്പെടുത്തണമെന്നും സ്റ്റാലിന്‍ പറഞ്ഞു. എന്‍ഫോഴ്സ്മെന്റ് ഡയറക്ടറേറ്റിന്റെ നടപടികളെക്കുറിച്ച് തനിക്ക് അറിയില്ലെന്ന് പറഞ്ഞതിന് പ്രധാനമന്ത്രി മോദിയെ സ്റ്റാലിന്‍ വിമര്‍ശിച്ചു.
‘മുന്‍ ജാര്‍ഖണ്ഡ് മുഖ്യമന്ത്രി ഹേമന്ത് സോറന്‍, ഡല്‍ഹി മുഖ്യമന്ത്രി അരവിന്ദ് കെജ്രിവാള്‍ എന്നിവരുടെ അറസ്റ്റിനെക്കുറിച്ച് നിങ്ങള്‍ അറിഞ്ഞിരുന്നില്ലേ? കോണ്‍ഗ്രസ് പാര്‍ട്ടിയുടെ അക്കൗണ്ടുകള്‍ മരവിപ്പിച്ചതിന് ശേഷം ആദായനികുതി സുപ്രീം കോടതിയില്‍ യു-ടേണ്‍ എടുത്തു. ഐ.ടിയും ഇ.ഡിയും സി.ബി.ഐയും എന്താണ് ചെയ്യുന്നതെന്ന് അറിയില്ലേ?’ സ്റ്റാലിന്‍ പറഞ്ഞു.
ദ്രാവിഡം എന്ന വാക്ക് ഇഷ്ടപ്പെടാത്തവരാണ് തന്നെ മതത്തിന്റെ ശത്രുവായി ചിത്രീകരിക്കാന്‍ ശ്രമിക്കുന്നതെന്നും അദ്ദേഹം പറഞ്ഞു.
‘ഞങ്ങള്‍ മതത്തെ ഭിന്നിപ്പിക്കുന്ന വര്‍ഗീയതയുടെ ശത്രുക്കളാണ്, കലൈഞ്ജറുടെ ശൈലിയില്‍ പറഞ്ഞാല്‍, ക്ഷേത്രം ഉണ്ടാകരുതെന്ന് ഞങ്ങള്‍ അവകാശപ്പെടുന്നില്ല, പക്ഷേ ക്ഷേത്രം ക്രൂരന്മാരുടെ പാളയമാകരുതെന്നാണ് ഞങ്ങള്‍ അവകാശപ്പെടുന്നത്. മൊത്തത്തില്‍, ജനങ്ങളെ ഭിന്നിപ്പിക്കാന്‍ മതം ഉപയോഗിക്കുന്നവര്‍ക്ക് ഞങ്ങള്‍ ശത്രുക്കളാണ്,’ സ്റ്റാലിന്‍ പറഞ്ഞു
Content Highlight: MK Stalin hit out Narendra Modi on Katchatheevu issue