ഇന്ത്യയുടെ സ്വന്തം 'പറക്കും സിംഗ്' ഇനിയില്ല; മില്‍ഖ സിംഗ് അന്തരിച്ചു
ഡൂള്‍ന്യൂസ് ഡെസ്‌ക്
Saturday, 19th June 2021, 7:53 am
ചണ്ഡീഗഡ്: ഇന്ത്യയുടെ ഇതിഹാസ കായികതാരം മില്‍ഖ സിംഗ് അന്തരിച്ചു. കൊവിഡ് മുക്തനായ ശേഷവും ആരോഗ്യപ്രശ്‌നങ്ങള്‍ തുടര്‍ന്നതിനാല്‍ ഒരു മാസത്തിലേറെയായി ചികിത്സയിലായിരുന്നു അദ്ദേഹം. 91 വയസായിരുന്നു.
മെയ് 20ന് രോഗബാധിതനായതു മുതല്‍ ആശുപത്രിയിലും വീട്ടിലുമായി കഴിയേണ്ടി വന്നിരുന്ന മില്‍ഖ സിംഗിന്റെ ആരോഗ്യ നില വെള്ളിയാഴ്ച രാത്രിയോടെ കൂടുതല്‍ വഷളായി. തുടര്‍ന്ന് രാത്രി 11.30ഓടെ മരണം സംഭവിക്കുകയായിരുന്നു.
ജൂണ്‍ 14ന് മില്‍ഖ സിംഗിന്റെ ഭാര്യയും ഇന്ത്യന്‍ വനിതാ വോളിബോള്‍ ടീം മുന്‍ ക്യാപ്റ്റനുമായ നിര്‍മല്‍ കൗര്‍ കൊവിഡ് ബാധിച്ച് മരിച്ചിരുന്നു.
ട്രാക്കിലെ ഇന്ത്യയുടെ ഏറ്റവും മികച്ച അത്‌ലറ്റുകളിലൊരാളായിരുന്നു മില്‍ഖ സിംഗ്. 1958ലെ കാഡിഫ് കോമണ്‍വെല്‍ത്ത് ഗെയിംസില്‍ 400 മീറ്ററില്‍ സ്വര്‍ണം നേടിയ മില്‍ഖ സിംഗ് ആ നേട്ടം സ്വന്തമാക്കുന്ന ആദ്യ ഇന്ത്യക്കാരനായി.
