വല്യ ഡെക്കറേഷൻ ഒന്നും വേണ്ട; മിഡ്‌ ടേബിൾ ടീം, അത് മതി; ലിവർപൂളിനെ വിമർശിച്ച് ആരാധകർ
സ്പോര്‍ട്സ് ഡെസ്‌ക്
Saturday, 11th March 2023, 11:03 pm
ഇംഗ്ലീഷ് പ്രീമിയർ ലീഗിലെ നീണ്ട തിരിച്ചടികൾക്ക് ശേഷം തിരിച്ചു വരുമെന്ന് തോന്നിപ്പിച്ച ലിവർപൂൾ വീണ്ടും ദയനീയ പരാജയം ഏറ്റുവാങ്ങിയിരിക്കുകയാണ്.
മാഞ്ചസ്റ്റർ യുണൈറ്റഡിനെ എതിരില്ലാത്ത ഏഴ് ഗോളുകൾക്ക് പരാജയപ്പെടുത്തി തങ്ങളുടെ പ്രതാപ കാലത്തെ പ്രകടനം പുറത്തെടുത്ത ക്ലബ്ബിന്, എന്നാൽ ശനിയാഴ്ച നടന്ന മത്സരത്തിൽ ബേർൺമൗത്തിനെതിരെയാണ് ദയനീയ പരാജയം ഏറ്റുവാങ്ങേണ്ടി വന്നത്. മത്സരം 28 മിനിട്ട് പിന്നിട്ടപ്പോൾ ഫിലിപ്പ് ബില്ലിങ്‌ നേടിയ ഗോളിനാണ് ബേർൺമൗത്ത് ലിവർപൂളിനെ തകർത്തത്.
എന്നാൽ മിഡ്‌ ടേബിൾ ക്ലബ്ബായ ബേർൺമൗത്തിനോട് പരാജയപ്പെട്ടതോടെ വലിയ വിമർശനങ്ങളാണ് ക്ലബ്ബിനും താരങ്ങൾക്കുമെതിരെ ലിവർപൂൾ ആരാധകർ ഉയർത്തുന്നത്. സലാ പെനാൾട്ടിയുൾപ്പെടെ നഷ്ടപ്പെടുത്തിയ മത്സരത്തിൽ അനായാസം വിജയിക്കാവുന്ന ഒരു മത്സരമായിരുന്നു ലിവർപൂൾ കൈവിട്ട് കളഞ്ഞത്.
