കോഴിക്കോട്: ലോകം ഒരു പന്തിലേക്ക് ചുരുങ്ങാന്‍ ദിവസങ്ങള്‍ മാത്രം ശേഷിക്കെ ആരാധകരുടെ ആവേശം ഏറ്റെടുത്ത് താരങ്ങളും. ലോകത്തിന്റെ വിവിധ ഭാഗങ്ങളില്‍ നിന്ന് അര്‍ജന്റീനന്‍ ടീമിനായി ആര്‍ത്തുവിളിക്കുന്നവരുടെ ആവേശം പങ്കുവെച്ച് സാക്ഷാല്‍ ലയണല്‍ മെസി പോസ്റ്റ് ചെയ്ത വീഡിയോ ആണ് മലയാളി ഫുട്ബാള്‍ ആരാധകരുടെ ചര്‍ച്ചാവിഷയം.
വാമോസ് അര്‍ജന്റീന, വാമോസ് ലിയോ തുടങ്ങിയ മുദ്രാവാക്യങ്ങള്‍ മുഴക്കുന്നതിന്റെ വീഡിയോ അയച്ചുകൊടുക്കാന്‍ നേരത്തെ മെസിയുടെ ഫേസ്ബുക്ക് പേജ് കൈകാര്യം ചെയ്യുന്നവര്‍ ആവശ്യപ്പെട്ടിരുന്നു.
ഇതിന്‍പ്രകാരമാണ് മലപ്പുറം എടവണ്ണ സ്വദേശികളായ അറയ്ക്കല്‍ ഷജീഹ്, ഹാസിഫ് എടപ്പാള്‍, ഷബീബ് മൊറയൂര്‍, ഷരീഫ് ഫറോഖ്, ആദിഷ് തൃശൂര്‍ എന്നിവര്‍ മലയാളം സ്പാനിഷില്‍ ഒരു വാമോസ് ഫേസ്ബുക്കിലിട്ടത്.
മെസിയുടെ ഫേസ്ബുക്ക് പേജ് കൈകാര്യം ചെയ്യുന്നവര്‍ അപ്പോള്‍ തന്നെ വീഡിയോ ഫേസ്ബുക്ക് വഴി പങ്കുവെച്ചു. ഇവര്‍ ചിത്രീകരിച്ച മൂന്ന് മിനുട്ട് ദൈര്‍ഘ്യമുള്ള വീഡിയോ കണ്ട ശേഷം ഇന്‍സ്റ്റാഗ്രാം വഴി ചിത്രങ്ങള്‍ അയച്ചുകൊടുക്കാന്‍ ആവശ്യപ്പെട്ടിരുന്നു. 22 സെക്കന്റ് ദൈര്‍ഘ്യമുള്ള വീഡിയോയിലാണ് ഇവര്‍ പ്രത്യക്ഷപ്പെടുന്നത്.
വീഡിയോ മെസിയുടെ ഒഫീഷ്യല്‍ അക്കൗണ്ടില്‍ ഷെയര്‍ ചെയ്തിട്ടുണ്ട്.