ബാഴ്‌സ വിടേണ്ടി വന്നതില്‍ സങ്കടമുണ്ട്, പി.എസ്.ജിയിലെ പരിചിതമുഖങ്ങളാണ് ആശ്വാസമായത്: മെസി
സ്പോര്‍ട്സ് ഡെസ്‌ക്
Saturday, 9th October 2021, 8:12 pm
പാരീസ്: ബാഴ്‌സ വിടേണ്ടി വന്നതില്‍ അതിയായ സങ്കടമുണ്ടെന്ന് സൂപ്പര്‍ താരം മെസി. കരിയര്‍ ആരംഭിച്ചത് മുതല്‍ കളിച്ചു വളര്‍ന്ന ടീമില്‍ നിന്നും പോവേണ്ടി വന്നത് സങ്കടമുണ്ടാക്കിയെന്നും എന്നാല്‍ പി.എസ്.ജിയിലെ പരിചിതമായ മുഖങ്ങള്‍ കണ്ടപ്പോള്‍ ദുഃഖത്തിന് അയവു വന്നെന്നും താരം പറയുന്നു.
‘കോപ്പയ്ക്ക് ശേഷം തിരിച്ചെത്തി പുതിയ സീസണിനുള്ള പരിശീലനം തുടങ്ങാനായിരുന്നു എന്റെ പ്ലാന്‍. കരാറൊപ്പിടുന്നതുമായുള്ള എല്ലാ നടപടികളും പൂര്‍ത്തിയായെന്നായിരുന്നു ഞാന്‍ കരുതിയിരുന്നത്. കരാറില്‍ എന്റെ ഒപ്പ് മാത്രമായിരുന്നു ബാക്കിയുള്ളത് എന്നായിരുന്നു എന്റെ ധാരണ.
എന്നാല്‍ ബാഴ്‌സയിലെത്തിയപ്പോഴാണ് കാര്യങ്ങള്‍ മാറിമറിഞ്ഞത്. ബാഴ്‌സയ്ക്ക് ഞാന്‍ താങ്ങാവുന്നതിനുമപ്പുറമായിരുന്നു. മറ്റ് മാര്‍ഗങ്ങളില്ലാത്തതിനാല്‍ ക്ലബുമായുള്ള ബന്ധം അവസാനിപ്പിക്കേണ്ടി വന്നു,’ മെസി പറയുന്നു.
