ബ്യൂട്ടിഫുള്‍ എന്ന ചിത്രത്തിന് ശേഷം അനൂപ് മേനോനും ജയസൂര്യക്കുമൊപ്പം വീണ്ടും ചേരുകയാണ് മേഘ്‌ന രാജ്. അടുത്ത വര്‍ഷം ജനുവരിയോടെ പുതിയ സിനിമയുടെ ചിത്രീകരണം നടക്കുമെന്നാണ് അറിയുന്നത്. ബ്യൂട്ടിഫുള്‍ ടീം തന്നെയാണ് ഈ ചിത്രത്തിന് പിന്നിലും എന്നാണ് അറിയുന്നത്.
വി.കെ. പ്രകാശ് തന്നെയാണ് പുതിയ ചിത്രവും സംവിധാനം ചെയ്യുന്നത്. അതേസമയം ചിത്രത്തിന്റെ പേരോ മറ്റ് കാര്യങ്ങളെകുറിച്ചോ ഇതുവരെ വിവരമൊന്നും ലഭിച്ചിട്ടില്ല. ചിത്രത്തിന്റെ ചര്‍ച്ചകള്‍ നടന്നുകൊണ്ടിരിക്കുകയാണെന്നും ഇപ്പോള്‍ കൂടുതല്‍ കാര്യങ്ങള്‍ പുറത്ത് പറയാന്‍ സാധിക്കില്ലെന്നുമാണ് മേഘ്‌ന പറയുന്നത്.[]
ഗുഡ്,ബാഡ്, അഗ്ലി എന്ന ചിത്രത്തിലാണ് മേഘ്‌ന ഇപ്പോള്‍ അഭിനയിച്ച് കൊണ്ടിരിക്കുന്നത്. മൂന്ന് യുവാക്കള്‍ കൊച്ചിയില്‍ നിന്നും തിരുവന്തപുരത്തേക്ക് നടത്തുന്ന യാത്രയാണ് ചിത്രത്തിന്റെ പ്രമേയം. ഇവരുടെ ഇടയിലേക്ക് ഒരു പെണ്‍കുട്ടി എത്തുന്നതോടെ കഥാഗതി മാറുന്നു.
കൂടാതെ മോഹന്‍ ലാല്‍ നായകനാകുന്ന റെഡ് വൈനിലും മേഘ്‌ന അഭിനയിക്കുന്നുണ്ട്. സലാം പാലാപെട്ടിയാണ് ചിത്രം സംവിധാനം ചെയ്യുന്നത്. ഫഹദ് ഫാസില്‍, ആസിഫ് അലി എന്നിവരും ചിത്രത്തില്‍ അഭിനയിക്കുന്നുണ്ട്.
വയനാടും കോഴിക്കോടുമായി സിനിമയുടെ ചിത്രീകരണം പുരോഗമിക്കുകയാണ്.