വയനാട്: മാനന്തവാടിയില്‍ പെണ്‍കുട്ടികളെ അപമാനിച്ചത് ചോദ്യം ചെയ്ത പിതാവിനെ സി.പി.ഐ.എം പ്രവര്‍ത്തകര്‍ മര്‍ദ്ദിച്ച സംഭവത്തില്‍ നടപടി. പെണ്‍കുട്ടികളുടെ രഹസ്യമൊഴി നാളെ മാനന്തവാടി മജിസ്‌ട്രേറ്റ് രേഖപ്പെടുത്തും.
കേസെടുത്തിട്ടും പ്രതികളെ ഇതുവരെ അറസ്റ്റ് ചെയ്തിരുന്നില്ല. സംഭവം വിവാദമായതിന് പിന്നാലെയാണ് പെണ്‍കുട്ടികളുടെ രഹസ്യമൊഴി രേഖപ്പെടുത്താന്‍ തീരുമാനിച്ചത്.
കഴിഞ്ഞ വെള്ളിയാഴ്ചയാണ് വയനാട്ടിലെ മാനന്തവാടി മുതിരേരിയില്‍ മകളേയും കൂട്ടുകാരിയേയും അപമാനിച്ചത് ചോദ്യം ചെയ്ത പിതാവിനെ നാലംഗ സംഘം ക്രൂരമായി മര്‍ദ്ദിക്കുകയും പല്ലടിച്ച് കൊഴിക്കുകയും ചെയ്തത്. സംഭവത്തില്‍ നാല് സി.പി.ഐ.എം പ്രവര്‍ത്തകര്‍ക്കെതിരെയാണ് പൊലീസ് കേസെടുത്തത്.
എന്നാല്‍ പ്രതികളെ പൊലീസ് പിടികൂടിയിട്ടില്ലെന്നാണ് കുടുംബത്തിന്റെ പരാതി. പ്രതികളെ രക്ഷിക്കാന്‍ പൊലീസ് ഒത്തുകളിക്കുകയാണെന്നും കുടുംബം ആരോപിച്ചിരുന്നു.
പരാതി നല്‍കി പിറ്റേ ദിവസമാണ് പൊലീസ് പെണ്‍കുട്ടിയുടെ പിതാവിന്റെ മൊഴിയെടുത്തത്. അതിന്റെ പിറ്റേന്നാണ് പെണ്‍കുട്ടികളുടെ മൊഴിയെടുത്തത്. സംഭവം നടന്ന് നാല് ദിവസം കഴിഞ്ഞിട്ടും ഇതുവരെ പ്രതികളെ അറസ്റ്റ് ചെയ്തിട്ടില്ലെന്നും ഉന്നത രാഷ്ട്രീയ ഇടപെടലുകള്‍ നടന്നതായി സംശയിക്കുന്നുണ്ടെന്നും കുടുംബം പറഞ്ഞു.
പൊലീസ് അന്വേഷിക്കാന്‍ വന്നപ്പോള്‍ ഞങ്ങള്‍ക്ക് തൃപ്തി തോന്നിയിരുന്നെന്നും എന്നാല്‍ എഫ്.ഐ.ആര്‍ കണ്ടപ്പോള്‍ അത് ഇല്ലാതായെന്നും പെണ്‍കുട്ടിയുടെ പിതാവ് പറഞ്ഞു.
തങ്ങളെ അപമാനിച്ചവരുടെ പേരൊന്നുമല്ല എഫ്.ഐ.ആറില്‍ കണ്ടതെന്നും ആളുകളെ മാറ്റാനുള്ള ശ്രമം നടന്നതായി സംശയിക്കുന്നുണ്ടെന്നും നീതി നിഷേധിക്കപ്പെടുകയാണെന്നും പെണ്‍കുട്ടി പറഞ്ഞു.
അതേസമയം സംഭവത്തില്‍ പ്രതികള്‍ക്കെതിരെ കുറ്റം ചുമത്തിയിട്ടുണ്ടെന്നും അന്വേഷണം പുരോഗമിക്കുകയുമാണെന്നാണ് മാനന്തവാടി പൊലീസ് പ്രതികരിച്ചത്.
വീടിന് സമീപത്തെ പുഴയില്‍ കുളിക്കാന്‍ പോയ മകളേയും കൂട്ടുകാരിയേയും അപമാനിക്കുകയും പെണ്‍കുട്ടികളുടെ ദൃശ്യങ്ങള്‍ മൊബൈലില്‍ പകര്‍ത്താന്‍ ശ്രമിക്കുകയുമായിരുന്നു പ്രതികള്‍. ഇത് ചോദിക്കാന്‍ ചെന്ന പിതാവിനെ അക്രമികള്‍ ക്രൂര മര്‍ദ്ദനത്തിന് ഇരയാക്കുകയായിരുന്നു.
മര്‍ദ്ദനത്തില്‍ പല്ല് തെറിച്ചുപോയെന്നും കരഞ്ഞപ്പോള്‍ മുഖവും മൂക്കും പൊത്തിപ്പിടിച്ചെന്നും ഇതോടെ വെപ്രാളത്തില്‍ അതിലൊരാളുടെ വിരലില്‍ കടിച്ചപ്പോള്‍ പിടിവിടുകയായിരുന്നെന്നും ഇദ്ദേഹം പറഞ്ഞു.
വാഹന അപകടത്തില്‍ ഗുരുതരമായി പരിക്കേറ്റ് കഴിഞ്ഞ ഒരു വര്‍ഷത്തോളമായി ചികിത്സയില്‍ കഴിഞ്ഞ വ്യക്തിയാണ് ഇദ്ദേഹം.
ഡൂള്‍ന്യൂസിനെ ഫേസ്ബുക്ക്, ടെലഗ്രാം, ഹലോ പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക