[] ആരാധകരുടെ ചോദ്യങ്ങള്‍ക്ക് ഉത്തരം നല്‍കി നടി മഞ്ചു വാര്യര്‍ ഫേസ്ബുക്കില്‍ ലൈവ് ചാറ്റ് നടത്തി. തന്റെ പുതിയ ചിത്രം “ഹൗ ഓള്‍ഡ് ആര്‍ യൂ”വിന്റെ പ്രമോഷനു വേണ്ടിയായിരുന്നു മഞ്ചു ഫേസ്ബുക്കില്‍ ലൈവ് ചാറ്റ് നടത്തിയത്.
ആരാധകര്‍ക്ക് മറുപടി നല്‍കവെ മോഹന്‍ലാലിനെ പോലെ ഒരു കലാകാരന്‍ ഇതുവരെ ഉണ്ടായിട്ടില്ലെന്നും ഇനി ഉണ്ടാകാന്‍ ഇടയില്ലെന്ന് മഞ്ജു അഭിപ്രായപ്പെട്ടു. ആറാം തമ്പുരാനില്‍ മോഹന്‍ലാലുമായി ആദ്യ സീന്‍ ചെയ്യാന്‍ എത്തുമ്പോള്‍ പരിഭ്രമമായിരുന്നു. എന്നാല്‍ സാധാരണക്കാരനെ പോലെ സെറ്റില്‍ വന്നിറങ്ങിയ ലാല്‍ അതിശയിപ്പിച്ചു. ലാലുമായി ചെയ്യുന്നത് പ്രധാന കഥാപാത്രമാണെന്ന് അഭിനയിക്കുമ്പോഴും അറിഞ്ഞിരുന്നില്ല- മഞ്ചു പറയുന്നു.
പുതിയ നടന്മാരില്‍ പൃഥ്വിരാജിനെയാണ് ഏറെയിഷ്ടം. പൃഥ്വിയുമായി ഒരു ചിത്രം ഒന്നിച്ചു ചെയ്യാന്‍ ദൈവം അവസരം നല്‍കുമെന്നാണ് കരുതുന്നത്. യുവ നടിമാരില്‍ നസ്രിയ മിടുക്കിയാണെങ്കിലും ഏറ്റവും ഇഷ്ടം ശോഭനയെയാണ്- അവര്‍പറഞ്ഞു.
നൃത്തമാണോ സിനിമയാണോ ഇഷ്ടമെന്ന ചോദ്യത്തിന് നൃത്തം കുഞ്ഞുന്നാള്‍ മുതല്‍ അഭ്യസിക്കുന്നതിനാല്‍ ഒരു പ്രത്യേക കമ്പമുണ്ടെന്നും അത്രയും തന്നെ താല്‍പര്യം സിനിമയോടുണ്ടെന്നും താരം പറഞ്ഞു.
ഒരു മണിക്കൂറോളം മഞ്ചു ആരാധകര്‍ക്ക് മറുപടി നല്‍കാന്‍ ചിലവഴിച്ചു. മുന്‍കൂട്ടി അയച്ച ചോദ്യങ്ങളില്‍ നിന്നും തിരഞ്ഞെടുത്തവക്കായിരുന്നു മഞ്ചു വാര്യരുടെ മറുപടി.