കന്നി കിരീടം തേടി സിറ്റി, ചെല്‍സിയുടെ ലക്ഷ്യം രണ്ടാം കിരീടം; യു.സി.എല്ലില്‍ ഇന്ന് ഇംഗ്ലീഷ് ഫൈനല്‍
സ്പോര്‍ട്സ് ഡെസ്‌ക്
Saturday, 29th May 2021, 5:55 pm
പോര്‍ട്ടോ: ഈ വര്‍ഷത്തെ യു.സി.എല്‍ ചാംപ്യന്‍മാരെ ഇന്നറിയാം. ഒരു ‘ഇംഗ്ലീഷ് ഫൈനലാണ്’ ഇന്ന് പോര്‍ച്ചുഗലിലെ പോര്‍ട്ടോയില്‍ നടക്കുന്നത്. പെപ് ഗ്വാര്‍ഡിയോളയുടെ മാഞ്ചസ്റ്റര്‍ സിറ്റിയും തോമസ് ടുച്ചെലിന്റെ ചെല്‍സിയുമാണ് ഇത്തവണത്തെ യുവേഫ ചാംപ്യന്‍സ് ലീഗ് കിരീടത്തിനായി മത്സരിക്കുന്നത്.
പോര്‍ട്ടോയിലെ എസ്റ്റാഡിയോ ഡോ ഡ്രഗാവോയില്‍ ഇന്ത്യന്‍ സമയം രാത്രി 12.30നാണ് കിക്കോഫ്. കൊവിഡ് വ്യാപനം മൂലമാണ് തുര്‍ക്കിയിലെ ഇസ്താംബൂളില്‍ നടക്കേണ്ടിയിരുന്ന മത്സരം പോര്‍ച്ചുഗലിലെ പോര്‍ട്ടോയിലേക്ക് മാറ്റുകയായിരുന്നു. സോണി ചാനലുകളില്‍ ഇന്ത്യയില്‍ തല്‍സമയം കാണാം.
ചരിത്രത്തിലെ ആദ്യ യുവേഫ ചാംപ്യന്‍സ് ലീഗ് കിരീടമാണു മാഞ്ചസ്റ്റര്‍ സിറ്റിയുടെ ലക്ഷ്യം. ചെല്‍സി രണ്ടാം കിരീടമാണു നോട്ടമിടുന്നത്. 2012ല്‍ ബയണ്‍ മ്യൂണിക്കിനെ അവരുടെ തട്ടകത്തില്‍ വീഴ്ത്തി ചെല്‍സി ജേതാക്കളായിരുന്നു.
