മലയാളത്തിന് പുറമെ തമിഴ്, തെലുങ്ക് തുടങ്ങിയ വിവിധ ഭാഷകളില്‍ ശ്രദ്ധേയമായ നടിയാണ് മംമ്ത മോഹന്‍ദാസ്. 2005ല്‍ ഹരിഹരന്‍ സംവിധാനം ചെയ്ത മയൂഖം എന്ന മലയാള ചിത്രത്തിലൂടെയാണ് നടി തന്റെ സിനിമാ കരിയര്‍ ആരംഭിക്കുന്നത്.
2010ല്‍ പുറത്തിറങ്ങിയ കഥ തുടരുന്നു എന്ന സത്യന്‍ അന്തിക്കാട് ചിത്രത്തിലൂടെയാണ് മംമ്ത കൂടുതല്‍ ശ്രദ്ധിക്കപ്പെടുന്നത്. ആ സിനിമയില്‍ അഭിനയത്തിലൂടെ മികച്ച രണ്ടാമത്തെ നടിക്കുള്ള സ്റ്റേറ്റ് അവാര്‍ഡ് നേടാനും മംമ്തക്ക് സാധിച്ചിരുന്നു.
മമ്മൂട്ടി, മോഹൻലാൽ, ജയറാം തുടങ്ങിയ മലയാളത്തിലെ മുൻനിര അഭിനേതാക്കളോടൊപ്പമെല്ലാം മംമ്ത അഭിനയിച്ചിട്ടുണ്ട്. തന്നെ സംബന്ധിച്ച് അത് വളരെ രസമുള്ള അനുഭവമായിരുന്നുവെന്നും അവരെല്ലാം എങ്ങനെയാണെന്ന് മനസിലാക്കാനാണ് താൻ ശ്രമിച്ചതെന്നും മംമ്ത പറയുന്നു. മോഹൻലാൽ ആരാധികയായ താൻ ബാബാകല്യാണി എന്ന സിനിമയിൽ അഭിനയിക്കുമ്പോൾ വലിയ ആകാംക്ഷയിൽ ആയിരുന്നുവെന്നും മംമ്ത കൂട്ടിച്ചേർത്തു.
അതു വളരെ രസകരമായ ഒരു അനുഭവമാണ്. പക്ഷേ. ഞാനതിനെക്കുറിച്ച് അധികം ചിന്തിച്ചിട്ടില്ല. ഒപ്പം ജോലി ചെയ്ത എല്ലാവരിൽ നിന്നും ഏറ്റവും അധികം മനസിലാക്കാൻ ശ്രമിച്ചതും മനസിലാക്കിയതും ഒരു വ്യക്തി എന്ന നിലയിൽ അവർ എങ്ങനെയാണ് എന്നാണ്. അതിനപ്പുറത്തേക്ക് അവരുടെ പ്രശസ്‌തിയെക്കുറിച്ച് ഞാൻ ചിന്തിച്ചിട്ടില്ല. വ്യക്തി എന്ന നിലയിൽ അവർ സൂക്ഷിക്കുന്ന ഊർജമാണ് അവർക്കൊപ്പം അഭിനയിക്കുമ്പോൾ നമ്മളെയും സഹായിക്കുക.
മോഹൻലാലിന്റെയും ശോഭനയുടെയും കടുത്ത ആരാധികയായ ഞാൻ ‘ബാബാകല്യാണി’യിൽ ലാലേട്ടന്റെ നായികയായി. ആരാധിക നായികയായി അഭിനയിക്കുന്നു എന്ന അതിശയത്തിലായിരുന്നു ആദ്യമൊക്കെ. പിന്നീടാണ് ആ വലിയ ഉത്തരവാദിത്തത്തെ കുറിച്ച് മനസിലാക്കി തുടങ്ങിയത് പോലും.
ഹരിഹരൻ സാർ എന്ന വലിയ സംവിധായകനൊപ്പം തുടങ്ങിയതിന്റെ ശ്രദ്ധ ആദ്യം മുതൽ കിട്ടിയിരുന്നു. എങ്കിലും ആദ്യ നാലു വർഷം എന്താണ് ചെയ്യുന്നതെന്ന് എനിക്കു തന്നെ ധാരണയില്ലായിരുന്നു. സിനിമ എൻ്റെ പാഷൻ ആണെന്നു പോലും അറിയാത്ത അവസ്‌ഥ.
അന്നും കഠിനാധ്വാനം ചെയ്യാനുള്ള മനസും അർപണബോധവും ഉണ്ടായിരുന്നു. എന്തിനാണ് ഇത്രയും ആത്മാർഥത കാണിക്കുന്നതെന്നൊന്നും അപ്പോൾ അറിയുമായിരുന്നില്ല. പരീക്ഷയ്ക്ക് പഠിക്കുന്നതു പോലെയാണ് ഞാൻ സിനിമയെയും സമീപിച്ചിരുന്നത്,’മംമ്ത പറയുന്നു.
Content Highlight: Mamtha Mohandas About Her Film Career
