കൊച്ചി: ബോളിവുഡ് സൂപ്പര്‍ താരം സണ്ണി ലിയോണ്‍ മധുരരാജയില്‍ അഭിനയിക്കുന്നു എന്ന വാര്‍ത്ത കഴിഞ്ഞ ദിവസമാണ് പുറത്തുവിട്ടത്. ചിത്രത്തിന്റെ ഷൂട്ടിംഗിനായി കൊച്ചിയില്‍ എത്തിയ സണ്ണിക്ക് വലിയ വരവേല്‍പ്പാണ് ആരാധകര്‍ നല്‍കിയത്.
ഇപ്പോഴിതാ ഷൂട്ടിംഗിനിടയ്ക്ക് മമ്മൂട്ടിയും സണ്ണി ലിയോണുമുള്ള ചിത്രം പുറത്തുവിട്ടിരിക്കുകയാണ് അണിയറപ്രവര്‍ത്തകര്‍. 2010ല്‍ പുറത്തിറങ്ങിയ ബ്ലോക്ബസ്റ്റര്‍ ചിത്രം പോക്കിരിരാജയുടെ രണ്ടാം ഭാഗമായി ഇറക്കുന്ന ചിത്രത്തിന്റെ ഫസ്റ്റ് ലുക്ക് കഴിഞ്ഞ ദിവസമാണ് പുറത്തുവിട്ടത്.
അനുശ്രീ,മഹിമ നമ്പിയാര്‍,ഷംന കാസിം എന്നിവരാണ് ചിത്രത്തിന്റെ നായിക നിരകളിലുള്ളത്. ചിത്രം 2019 വിഷു റിലീസായി തിയേറ്ററുകളിലെത്തും. 120 ദിവസം നീണ്ടു നില്‍ക്കുന്ന ചിത്രീകരണം 3 ഷെഡ്യൂളുകളായി തമിഴ് നാട്ടിലും കേരളത്തിലുമായി പൂര്‍ത്തിയായി കൊണ്ടിരിക്കുകയാണ്.
Also Read തെന്നിന്ത്യയില്‍ ചുവടുറപ്പിക്കാന്‍ പ്രിയാ വാര്യര്‍; നാനിയുടെ നായികയാവുമെന്ന് സൂചന
തമിഴ് താരം ജയ്, മമ്മൂട്ടിക്കൊപ്പം ഒരു മുഴുനീള കഥാപാത്രമായി ചിത്രത്തിലെത്തുമെന്നാണ് സൂചന. തെലുങ്ക് താരം ജഗപതി ബാബുവാണ് വില്ലന്‍. ഇതിനു പുറമെ മലയാളം , തമിഴ് , തെലുങ്ക് ഭാഷകളിലെ വന്‍ താരനിരയും അണിനിരക്കുന്നു. ആര്‍.കെ സുരേഷ്, നെടുമുടി വേണു, വിജയരാഘവന്‍,സലിം കുമാര്‍, അജു വര്‍ഗീസ്, ധര്‍മജന്‍ , ബിജു കുട്ടന്‍, സിദ്ധിഖ്, എം. ആര്‍ ഗോപകുമാര്‍, കൈലാഷ്,ബാല, മണിക്കുട്ടന്‍, നോബി, ബാലചന്ദ്രന്‍ ചുള്ളിക്കാട്, ചേര്‍ത്തല ജയന്‍,ബൈജു എഴുപുന്ന, കരാട്ടെ രാജ് തുടങ്ങിയവര്‍ മറ്റു പ്രധാന താരങ്ങളാകുന്നു.
ഉദയകൃഷ്ണയുടെ തിരക്കഥയില്‍ വൈശാഖ് സംവിധാനം ചെയ്യുന്ന ചിത്രം നിര്‍മ്മിക്കുന്നത് നെല്‍സണ്‍ ഐപ്പാണ്. പീറ്റര്‍ ഹെയ്നാണ് ആക്ഷന്‍ കൊറിയോഗ്രഫി ചെയ്തിരിക്കുന്നത്.
2010 ല്‍ തിയറ്ററുകളെ ഇളക്കി മറിച്ച പോക്കിരി രാജ രണ്ടാം വരവിനൊരുമ്പോള്‍ ആരാധകര്‍ ഏറ്റെടുക്കുമെന്ന പ്രതീക്ഷയിലാണ് സംവിധായകന്‍. ആക്ഷന്‍, കോമഡി, ഇമോഷന്‍, ഗാനങ്ങള്‍ എന്നിവക്കെല്ലാം പ്രാധാന്യം നല്‍കി ഒരു തട്ടുപൊളിപ്പന്‍ ആഘോഷ ചിത്രമായിരിക്കും മധുര രാജ എന്നാണ് സൂചന.
ഷാജി കുമാര്‍ ഛായാഗ്രഹണം, സംഗീതം ഗോപി സുന്ദര്‍, കലാ സംവിധാനം ജോസഫ് നെല്ലിക്കല്‍,സൗണ്ട് ഡിസൈന്‍ പി എം സതീഷ്,പ്രൊഡക്ഷന്‍ കണ്‍ട്രോളര്‍ അരോമ മോഹ, എക്സി . പ്രൊഡ്യൂസര്‍ വി എ താജുദീന്‍, മേക്കപ്പ് രഞ്ജിത്ത് അമ്പാടി, കോസ്റ്റിയൂം സായ്, ഗാനരചന -മുരുഗന്‍ കാട്ടാക്കട, ഹരി നാരായണന്‍.
ഒരേ സമയം മലയാളം തമിഴ് തെലുങ്കു ഭാഷകളില്‍ ചിത്രം റിലീസ് ചെയ്യും. നെല്‍സണ്‍ ഐപ്പ് സിനിമാസിന്റെ ബാനറില്‍ നെല്‍സണ്‍ ഐപ്പ് നിര്‍മിക്കുന്ന ചിത്രം വിതരണത്തിന് എത്തിക്കുന്നത് യു.കെ സിനിമാസാണ്.
DoolNews Video