ഫ്രീഡം ഫൈറ്റ്; ജിയോ ബേബിയുടെ ആന്തോളജി ചിത്രത്തിന്റെ ടൈറ്റില്‍ പോസ്റ്റര്‍ മമ്മൂട്ടി പുറത്തുവിട്ടു
എന്റര്‍ടെയിന്‍മെന്റ് ഡെസ്‌ക്
Sunday, 24th October 2021, 11:41 am
മലയാളത്തില്‍ ഏറെ ശ്രദ്ധ നേടിയ ‘ദ ഗ്രേറ്റ് ഇന്ത്യന്‍ കിച്ചണി’ന് ശേഷം ജിയോ ബേബി സംവിധാനം ചെയ്യുന്ന അടുത്ത സിനിമ പ്രഖ്യാപിച്ചു. ആന്തോളജി സിനിമയായ ചിത്രത്തിന് ഫ്രീഡം ഫൈറ്റ് (സ്വാതന്ത്ര്യ സമരം) എന്നാണ് പേരിട്ടിരിക്കുന്നത്.
ജിയോ ബേബിക്ക് പുറമേ കുഞ്ഞില മാസ്സിലാമണി, ജിതിന്‍ ഐസക് തോമസ്, അഖില്‍ അനില്‍കുമാര്‍, ഫ്രാന്‍സിസ് ലൂയിസ് എന്നിവരാണ് ആന്തോളജി ചിത്രത്തിലെ മറ്റ് സംവിധായകര്‍.
മമ്മൂട്ടിയാണ് ചിത്രത്തിന്റെ ടൈറ്റില്‍ പോസ്റ്റര്‍ തന്റെ ഫേസ്ബുക്ക് പേജ് വഴി പുറത്തുവിട്ടത്. പോസ്റ്റില്‍ സിനിമയുടെ അണിയറപ്രവര്‍ത്തകര്‍ക്ക് മമ്മൂട്ടി ആശംസകളറിയിക്കുകയും ചെയ്തു.
അഞ്ച് സംവിധായകരും തങ്ങളുടെ ഫേസ്ബുക്ക് പേജുകള്‍ വഴി ചിത്രത്തിന്റെ ഫസ്റ്റ്‌ലുക്ക് പോസ്റ്റര്‍ പങ്കുവെച്ചു. പോസ്റ്റിന് താഴെ നിരവധി പേരാണ് ആശംസകളറിയിച്ച് കമന്റ് ചെയ്തിരിക്കുന്നത്.
