ചന്തു ചേകവരുടെയും ഉണ്ണിയാര്‍ച്ചയുടെയും കഥ പറഞ്ഞ സിനിമയായിരുന്നു 1989ല്‍ പുറത്തിറങ്ങിയ ഒരു വടക്കന്‍ വീരഗാഥ. ഇന്നും മലയാളത്തിന്റെ ക്ലാസിക്കായി കണക്കാക്കുന്ന ഈ ചിത്രം എം.ടി. വാസുദേവന്‍ നായരുടെ തിരക്കഥയില്‍ ഹരിഹരന്‍ ആയിരുന്നു സംവിധാനം ചെയ്തത്.

വടക്കന്‍പാട്ട് കഥകളെ ആധാരമാക്കി അണിയിച്ചൊരുക്കിയ ചിത്രത്തിന് നാല് ദേശീയ അവാര്‍ഡുകളും എട്ട് സംസ്ഥാന അവാര്‍ഡുകളും ലഭിച്ചിരുന്നു. സിനിമയില്‍ ഉണ്ണിയാര്‍ച്ചയായി മാധവി എത്തിയപ്പോള്‍ മമ്മൂട്ടി ചന്തുവായിട്ടാണ് അഭിനയിച്ചത്. ഇപ്പോള്‍ ഒരു വടക്കന്‍ വീരഗാഥയുടെ റീ റിലീസിന്റെ ഭാഗമായി മമ്മൂട്ടി കമ്പനിയുടെ യൂട്യൂബ് ചാനലില്‍ ചിത്രത്തെ കുറിച്ച് സംസാരിക്കുകയാണ് നടന്‍.

‘ഒരു സിനിമയിലാണെങ്കിലും കഥയിലാണെങ്കിലും ഓതര്‍ ബാക്ഡ് ക്യാരക്ടേഴ്‌സും ഓതര്‍ ബാക്ഡല്ലാത്ത ക്യാരക്ടേഴ്‌സും ഉണ്ടാകാം. ചിലപ്പോള്‍ കഥാപരമായി തന്നെ അതിലെ കഥാപാത്രം നല്ലതായിരിക്കാം. എന്നാല്‍ ചിലത് കഥാപരമായി ആളുകള്‍ക്ക് ഇഷ്ടപ്പെടാത്ത തരത്തിലാകും.

അങ്ങനെ മുമ്പേ തന്നെയുള്ള കഥയാണ് ഉണ്ണിയാര്‍ച്ചയുടേതും ചന്തുവിന്റേതും ആരോമല്‍ ചേകവരുടേതും. അത് പുത്തൂരം വീട്ടിലെ കഥയാണ്. കേട്ട് പഴകിയതും കണ്ട് കഴിഞ്ഞതുമായ കഥയാണ് ഈ സിനിമയുടേത്. ഉണ്ണിയാര്‍ച്ച എന്ന സിനിമ നേരത്തെ എടുത്തിട്ടുണ്ട്.

പിന്നെ പാടി തെളിഞ്ഞ വടക്കന്‍ പാട്ടുകളിലൂടെയൊക്കെയാണ് ഈ കഥ ആളുകള്‍ക്ക് പരിചയം. അതിലൊക്കെ ചന്തു ഒരു ചതിയനാണ്. അയാള്‍ അത്രത്തോളം നികൃഷ്ടനായ ആളായിട്ടാണ് കഥകളില്‍ ചിത്രീകരിച്ചിരിക്കുന്നത്. സിനിമയില്‍ കാണുന്നത് പോലെ തന്നെയാണ് ആ കഥ.

പക്ഷെ മുമ്പ് വന്നത് ഉണ്ണിയാര്‍ച്ചയുടെയോ ആരോമല്‍ ചേകവരുടെയോ വീക്ഷണത്തിലുള്ള കഥകളാണ്. ആരോമല്‍ ചേകവരുടേതെന്ന് പറയാന്‍ പറ്റില്ല. കാരണം അദ്ദേഹം ഇടക്ക് മരണപ്പെട്ടു പോകുന്നുണ്ട്. ശരിക്കും പറഞ്ഞാല്‍, ഉണ്ണിയാര്‍ച്ചയുടെ കഥ പറയുന്ന കൂട്ടത്തിലാണ് ഈ കഥാപാത്രങ്ങളൊക്കെ വന്നു പോകുന്നത്.

പക്ഷെ എന്തുകൊണ്ട് ചന്തുവിന്റെ കാഴ്ചപ്പാടില്‍ ഒരു കഥയുണ്ടാക്കിക്കൂടാ? ചന്തുവിന്റെ മനസില്‍ എന്തായിരിക്കും പോയിട്ടുണ്ടാകുക? ചന്തു ഈ സംഭവങ്ങളെയൊക്കെ എങ്ങനെയാകും കണ്ടിട്ടുണ്ടാകുക?

അങ്ങനെ നോക്കുമ്പോള്‍ എന്താണ് യഥാര്‍ത്ഥത്തില്‍ ചന്തുവെന്നുള്ളത് അന്വേഷിച്ച് പോയതായിരിക്കണം എം.ടി. അതില്‍ നിന്ന് കണ്ടെത്തിയതാകണം ചതിയന്‍ ചന്തുവിന്റെ ഈ വെളുപ്പിക്കല്‍,’ മമ്മൂട്ടി പറഞ്ഞു.

Content Highlight: Mammootty Talks About MT Vasudevan Nair And Oru Vadakkan Veeragatha