കൊല്‍ക്കത്ത: പാചക വാതക വിലവര്‍ധനവിനെതിരെ സ്ത്രീകളെ അണിനിരത്തി പ്രതിഷേധയാത്ര സംഘടിപ്പിക്കാനൊരുങ്ങി തൃണമൂല്‍ കോണ്‍ഗ്രസ്. മുഖ്യമന്ത്രി മമത ബാനര്‍ജി നയിക്കുന്ന പദയാത്രയിലാണ് സ്ത്രീകള്‍ പങ്കെടുക്കുക.
മാര്‍ച്ച് 7നാണ് പദയാത്ര. ഡാര്‍ജലിംഗ്, സിലിഗുരി പ്രദേശങ്ങളിലാണ് പദയാത്ര സംഘടിപ്പിക്കുകയെന്ന് തൃണമൂല്‍ നേതാവ് ചന്ദ്രിമ ഭട്ടാചാര്യ അറിയിച്ചു.
അതേസമയം നിയമസഭാ തെരഞ്ഞെടുപ്പില്‍ തൃണമൂല്‍ കോണ്‍ഗ്രസിന് പിന്തുണ നല്‍കാന്‍ തീരുമാനിച്ചതായി ശിവസേന വൃത്തങ്ങള്‍ അറിയിച്ചിരിക്കുകയാണ്.
ബംഗാള്‍ തെരഞ്ഞെടുപ്പില്‍ മമതാ ബാനര്‍ജിയ്ക്കെതിരെ നില്‍ക്കേണ്ടെന്നാണ് ശിവസേനയുടെ തീരുമാനമെന്ന് ശിവസേന നേതാവ് സഞ്ജയ് റാവത്ത് പറഞ്ഞു. തെരഞ്ഞെടുപ്പില്‍ തീര്‍ച്ചയായും മമത വിജയിക്കണമെന്നാണ് ശിവസേന ആഗ്രഹിക്കുന്നതെന്നും റാവത്ത് പറഞ്ഞു.
പണം, കൈക്കരുത്ത്, മാധ്യമങ്ങള്‍ എന്നിവയൊക്കെ ഉപയോഗിച്ച് മമതാ ബാനര്‍ജിയെ അടിച്ചമര്‍ത്താന്‍ ശ്രമിക്കുകയാണെന്നും റാവത്ത് പറഞ്ഞു. ഇത്തരം ഒരു അവസ്ഥയില്‍ പശ്ചിമ ബംഗാള്‍ തെരഞ്ഞെടുപ്പില്‍ മത്സരിക്കേണ്ടെന്നും പകരം മമതയ്ക്ക് പിന്തുണ നല്‍കാമെന്ന് ശിവസേന തീരുമാനിക്കുകയായിരുന്നെന്നും സഞ്ജയ് റാവത്ത് പറഞ്ഞു.
തൃണമൂല്‍ കോണ്‍ഗ്രസിന് പിന്തുണ നല്‍കുന്ന വിഷയത്തില്‍ ശിവസേന അധ്യക്ഷന്‍ ഉദ്ദവ് താക്കറെയുമായി ചര്‍ച്ച ചെയ്ത് തീരുമാനത്തില്‍ എത്തിയെന്നും റാവത്ത് പറഞ്ഞു.
മാര്‍ച്ച് 27 മുതല്‍ ഏപ്രില്‍ 29 വരെയാണ് ബംഗാളില്‍ തെരഞ്ഞെടുപ്പ് നടക്കുക.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
Content Highlights; Mamatha Banerjee Conducts Padyaatra With Women Aganist LPG Price Hike