ആ സിനിമ കണ്ട് മോഹന്‍ലാലാണ് എന്നെ ബ്രോ ഡാഡിയിലേക്ക് വിളിച്ചത്, അല്ലാതെ പൃഥ്വിയല്ല: മല്ലിക സുകുമാരന്‍

കഴിഞ്ഞ നാല് പതിറ്റാണ്ടിലധികമായി മലയാളികള്‍ക്ക് പരിചിതമായ മുഖമാണ് മല്ലിക സുകുമാരന്റേത്. കരയിറിന്റെ തുടക്കത്തില്‍ നിരവധി സിനിമകളുടെ ഭാഗമായ മല്ലിക, സുകുമാരന്റെ മരണശേഷം സിനിമയില്‍ നിന്ന് വലിയൊരു ഇടവേളയെടുത്തിരുന്നു. പിന്നീട് വര്‍ഷങ്ങള്‍ക്ക് ശേഷം ടെലിവിഷന്‍ രംഗത്തൂടെ തിരിച്ചുവരികയും വീണ്ടും സിനിമയില്‍ സജീവമാവുകയും ചെയ്തു. പൃഥ്വിരാജ് സംവിധാനം ചെയ്ത് മോഹന്‍ലാല്‍ നായകനായ ബ്രോ ഡാഡിയെക്കുറിച്ച് സംസാരിക്കുകയാണ് മല്ലിക.

ആ സിനിമയിലേക്ക് തന്നെ വിളിച്ചത് പൃഥ്വിയല്ലെന്ന് പറയുകയാണ് മല്ലിക സുകുമാരന്‍. ഒരു ദിവസം പൃഥ്വി തന്റെയടുത്തേക്ക് വന്നിട്ട് ഇപ്പോള്‍ ഒരു ഫോണ്‍കോള്‍ വരുമെന്നും എന്തായാലും എടുക്കണമെന്നും പറഞ്ഞെന്ന് മല്ലിക പറഞ്ഞു. ആ സമയത്ത് മോഹന്‍ലാല്‍ തന്ന വിളിച്ചിട്ട് ബ്രോ ഡാഡി എന്ന സിനിമയെക്കുറിച്ച് സംസാരിച്ചെന്നും ആ സിനിമയില്‍ അഭിനയിക്കാന്‍ പറ്റുമോ എന്ന് ചോദിച്ചെന്നും മല്ലിക കൂട്ടിച്ചേര്‍ത്തു. മോഹന്‍ലാലിന്റെ അമ്മയുടെ വേഷമാണെന്ന് അറിഞ്ഞപ്പോള്‍ തന്നെ താന്‍ ഓക്കെയായിരുന്നുവെന്ന് മല്ലിക പറഞ്ഞു.

താന്‍ അതിന് മുമ്പ് അഭിനയിച്ച സാറാസ് എന്ന സിനിമ കണ്ടെന്നും ആ സിനിമയിലേത് പോലെ ഒരു അമ്മച്ചി ഈ സിനിമക്കും വേണമെന്ന് മോഹന്‍ലാല്‍ പറഞ്ഞെന്നും മല്ലിക കൂട്ടിച്ചേര്‍ത്തു. താന്‍ ആ സിനിമ ചെയ്യാമെന്ന് സമ്മതിച്ചെന്നും മോഹന്‍ലാല്‍ വിളിച്ചതിന് ശേഷം ആന്റണി പെരുമ്പാവൂരും തന്നെ വിളിച്ച് സിനിമയുടെ കാര്യം സംസാരിച്ചെന്നും മല്ലിക പറഞ്ഞു. ഇതെല്ലാം പൃഥ്വിക്ക് ആദ്യമേ അറിയാമായിരുന്നെന്നും എല്ലാം മിണ്ടാതെ കണ്ടുനിന്നുവെന്നും മല്ലിക കൂട്ടിച്ചേര്‍ത്തു. കൈരളി ടി.വിയോട് സംസാരിക്കുകയായിരുന്നു മല്ലിക സുകുമാരന്‍.

‘ബ്രോ ഡാഡിയിലേക്ക് എന്നെ വിളിച്ചത് മോഹന്‍ലാലാണ്, അല്ലാതെ പൃഥ്വിയല്ല. പൃഥ്വിക്ക് നേരത്തെ അറിയാമായിരുന്നു എന്ന് മാത്രം. പക്ഷേ എന്നോട് ഒന്നും അവന്‍ പറഞ്ഞില്ലായിരുന്നു. ഒരു ദിവസം ഞാന്‍ വീട്ടിലിരിക്കുമ്പോള്‍ പൃഥ്വി അങ്ങോട്ട് കയറിവന്നിട്ട് ‘അമ്മക്ക് ഇപ്പോള്‍ ഒരു ഫോണ്‍ കോള്‍ വരും’ എന്ന് പറഞ്ഞു. ആരാണ് എന്താണ് എന്നൊന്നും പറഞ്ഞില്ല.

കുറച്ചു കഴിഞ്ഞപ്പോള്‍ ലാലു എന്നെ വിളിച്ചിട്ട് ബ്രോ ഡാഡിയുടെ കാര്യം പറഞ്ഞു. ആ കഥ എനിക്ക് ഇഷ്ടപ്പെട്ടു. എന്നിട്ട് ലാലു എന്നോട് ‘ചേച്ചി അഭിനയിച്ച സാറാസ് ഞാന്‍ കണ്ടിരുന്നു. ഈ സിനിമയിലും ഞങ്ങള്‍ക്ക് അതുപോലെ ഒരു അമ്മച്ചിയെ വേണം’ എന്ന് പറഞ്ഞു. മോഹന്‍ലാലിന്റെ അമ്മയാണെന്ന് അറിഞ്ഞപ്പോള്‍ തന്നെ ഞാന്‍ ഓക്കെ പറഞ്ഞു. ലാലു വിളിച്ചതിന് ശേഷം ആന്റണിയും എന്നെ വിളിച്ച് ബാക്കി കാര്യങ്ങള്‍ സംസാരിച്ചു. രാജു ഇതെല്ലാം കണ്ടുകൊണ്ട് നില്‍ക്കുകയായിരുന്നു,’ മല്ലിക സുകുമാരന്‍ പറഞ്ഞു.

Content Highlight: Mallika Sukumaran saying that Mohanlal called her for Bro Daddy movie