കേരളത്തിലുള്ളവര്‍ അടിച്ചുകേറി വരേണ്ട സമയം കഴിഞ്ഞെന്ന് പിണറായി, കെ.എസ്.ആര്‍.ടി.സിയിലേക്ക് അടിച്ചു കയറാന്‍ പറഞ്ഞ് ഗണേഷ്‌കുമാര്‍: മഹേഷേട്ടന്‍ മാസല്ല കൊലമാസാണ്
മിമിക്രിയിലൂടെ മലയാളികളെ അത്ഭുതപ്പെടുത്തിയ ആളാണ് മഹേഷ് കുഞ്ഞുമോന്‍. നിമിഷങ്ങള്‍ കൊണ്ട് പല സെലിബ്രിറ്റികളുടെയും ശബ്ദം അനുകരിച്ച് ഞെട്ടിച്ച മഹേഷിന്റെ പുതിയ വീഡിയോയാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ച. സമൂഹ മാധ്യമങ്ങളില്‍ ട്രെന്‍ഡായി മാറിയ ‘അടിച്ച് കേറി വാ എന്ന ഡയലോഗാണ് പല സെലിബ്രിറ്റികളുടെയും ശബ്ദത്തില്‍ മഹേഷ് അവതരിപ്പിച്ചത്.
റിയാസ് ഖാന്റെ ശബ്ദം മുതല്‍ പിണറായി വിജയന്റെ ശബ്ദം വരെ മഹേഷ് ഈ വീഡിയോയില്‍ അവതരിപ്പിച്ചിട്ടുണ്ട്. എങ്കിലും എടുത്ത് പറയേണ്ടത് ജയസൂര്യയുടെ ശബ്ദം അനുകരിച്ചതാണ്. മിമിക്രി ഫീല്‍ഡിലുള്ള പലര്‍ക്കും അത്ര എളുപ്പത്തില്‍ അനുകരിക്കാന്‍ സാധിക്കാത്ത ശബ്ദമാണ് ജയസൂര്യയുടേത്.
ബിനു പപ്പു, സന്തോഷ് ജോര്‍ജ് കുളങ്ങര, അഖില്‍ മാരാര്‍ തുടങ്ങി 21 പേരുടെ ശബ്ദമാണ് രണ്ടര മിനിറ്റ് ദൈര്‍ഘ്യമുള്ള വീഡിയോയില്‍ മഹേഷ് അവതരിപ്പിച്ചത്. കഴിഞ്ഞ വര്‍ഷം വലിയൊരു വാഹനാപകടത്തില്‍ പെട്ട് രണ്ട് മാസത്തോളം മഹേഷിന് ആശുപത്രിയില്‍ കഴിയേണ്ടി വന്നു. തിരിച്ചു വരവിന് ശേഷം പഴയതിനെക്കാള്‍ മികച്ച രീതിയിലാണ് മഹേഷ് ഓരോ വീഡിയോയും ചെയ്തത്.
അതേസമയം റിയാസ് ഖാന്റെ അടിച്ച് കേറി വാ എന്ന ഡയലോഗ് സോഷ്യല്‍ മീഡിയയില്‍ നിറഞ്ഞ് നില്‍ക്കുകയാണ്. കുട്ടനാട്ടിലെ വള്ളംകളിയുടെ പശ്ചാത്തലത്തില്‍ കഥപറഞ്ഞ ജലോത്സവമെന്ന ചിത്രത്തില്‍ റിയാസ് ഖാനായിരുന്നു വില്ലനായി എത്തിയത്. ചീങ്കണ്ണി ജോസെന്ന് വിളിപേരുള്ള ദുബായ് ജോസിന്റെ കഥാപാത്രത്തെയായിരുന്നു താരം അവതരിപ്പിച്ചത്.
സിനിമ ഇറങ്ങി 20 വര്‍ഷങ്ങള്‍ പൂര്‍ത്തിയാകുമ്പോള്‍ ചീങ്കണ്ണി ജോസെന്ന ദുബായ് ജോസ് സോഷ്യല്‍ മീഡിയയില്‍ തരംഗമാകുകയാണ്. മീമുകളായും എഡിറ്റ് ചെയ്ത വീഡിയോ ആയിട്ടുമാണ് ദുബായ് ജോസ് വൈറലാകുന്നത്.
Content Highlight: Mahesh Kunjumon imitates trending dialogue of Riyas Khan’s dialouge in different celebrity’s voice
