ശ്രീലങ്കയുടെ ന്യൂസിലാന്‍ഡ് പര്യടനത്തില്‍ രണ്ടാം ഏകദിനത്തില്‍ ചരിത്രം കുറിച്ച് രാജസ്ഥാന്‍ റോയസിന്റെ ശ്രീലങ്കന്‍ സൂപ്പര്‍ സ്പിന്നര്‍ മഹീഷ് തീക്ഷണ. ഹാമില്‍ട്ടണില്‍ നടന്ന മത്സരത്തില്‍ ഹാട്രിക് സ്വന്തമാക്കിയാണ് തീക്ഷണ തിളങ്ങിയത്.
ഏകദിന ഫോര്‍മാറ്റില്‍ ഹാട്രിക് നേടുന്ന എട്ടാമത് ശ്രീലങ്കന്‍ താരവും രണ്ടാമത് സ്പിന്നറുമാണ് തീക്ഷണ.
35ാം ഓവറിലെ അഞ്ചാം പന്തില്‍ ക്യാപ്റ്റന്‍ മിച്ചല്‍ സ്ന്റ്‌നറിനെ പുറത്താക്കിയാണ് തീക്ഷണ ഹാട്രിക്കിലേക്കുള്ള ആദ്യ ചുവടുവെച്ചത്. 15 പന്തില്‍ 20 റണ്‍സ് നേടി നില്‍ക്കവെ കിവീസ് നായകനെ ചാമിന്ദു വിക്രമസിംഗെയുടെ കൈകളിലെത്തിച്ച് താരം മടക്കി. തൊട്ടടുത്ത പന്തില്‍ നഥാന്‍ സ്മിത്തിനെ കാമിന്ദു മെന്‍ഡിസിന്റെ കൈകളിലെത്തിച്ച് ഗോള്‍ഡന്‍ ഡക്കാക്കിയും താരം പുറത്താക്കി.
37ാം ഓവറിലെ ആദ്യ പന്തില്‍ മാറ്റ് ഹെന്‌റിയെ പുറത്താക്കിയാണ് തീക്ഷണ ഹാട്രിക് പൂര്‍ത്തിയാക്കുന്നത്. നുവാനിന്ദു ഫെര്‍ണാണ്ടോക്ക് ക്യാച്ച് നല്‍കിയായിരുന്നു ഹെന്‌റിയുടെ മടക്കം.
ഏകദിന ഫോര്‍മാറ്റില്‍ ശ്രീലങ്കയുടെ പത്താം ഹാട്രിക് നേട്ടമാണിത്.
(താരം – എതിരാളികള്‍ – വര്‍ഷം)
ചാമിന്ദ വാസ് – സിംബാബ്‌വേ – 2001
ചാമിന്ദ വാസ് – ബംഗ്ലാദേശ് – 2003
ലസിത് മലിംഗ – സൗത്ത് ആഫ്രിക്ക – 2007
ഫര്‍വീസ് മെഹറൂഫ് – ഇന്ത്യ – 2010
ലസിത് മലിംഗ – കെനിയ – 2011
ലസിത് മലിംഗ – ഓസ്‌ട്രേലിയ – 2011
തിസര പെരേര – പാകിസ്ഥാന്‍ – 2012
വാനിന്ദു ഹസരങ്ക – സിംബാബ്‌വേ – 2017
ദുഷ്മന്ത മധുശങ്ക – ബംഗ്ലാദേശ് – 2018
മഹീഷ് തീക്ഷണ – ന്യൂസിലാന്‍ഡ് – 2025*
അതേസമയം, തീക്ഷണയുടെ ഹാട്രിക്കും ശ്രീലങ്കയെ തുണച്ചില്ല. മഴ കളിച്ച മത്സരത്തില്‍ 113 റണ്‍സിന് ശ്രീലങ്ക പരാജയപ്പെട്ടു.
മഴ മൂലം 37 ഓവറായി വെട്ടിച്ചുരുക്കിയ മത്സരത്തില്‍ കിവികള്‍ ഒമ്പത് വിക്കറ്റ് നഷ്ടത്തില്‍ 255 റണ്‍സ് നേടി. രചിന്‍ രവീന്ദ്രയുടെയും ഡാരില്‍ മിച്ചലിന്റെയും അര്‍ധ സെഞ്ച്വറികളുടെ കരുത്തിലാണ് ആതിഥേയര്‍ മികച്ച സ്‌കോറിലെത്തിയത്.
37 ഓവറില്‍ 256 റണ്‍സ് ലക്ഷ്യമിട്ടിറങ്ങിയ ലങ്കയ്ക്ക് തുടക്കത്തിലേ പിഴച്ചു. പാതും നിസങ്കയും കുശാല്‍ മെന്‍ഡിസും ഒറ്റയക്കത്തിന് പുറത്തായി. എന്നാല്‍ നാലാം നമ്പറിലിറങ്ങിയ കാമിന്ദു മെന്‍ഡിസ് ചെറുത്തു നിന്നു.
അര്‍ധ സെഞ്ച്വറിയുമായി മെന്‍ഡിസ് തിരിച്ചടിക്കാന്‍ ശ്രമിച്ചെങ്കിലും മറുവശത്ത് നിന്ന് ആരുടെയും പിന്തുണ താരത്തിന് ലഭിച്ചില്ല. ഒടുവില്‍ ലങ്ക 142 റണ്‍സിന് പുറത്തായി. 66 പന്തില്‍ 64 റണ്‍സെടുത്ത മെന്‍ഡിസിന്റെ അര്‍ധ സെഞ്ച്വറി പാഴാവുകയും ചെയ്തു.
ജനുവരി 11നാണ് പരമ്പരയിലെ ഡെഡ് റബ്ബര്‍ മത്സരം. ഒക്‌ലാന്‍ഡിലെ ഈഡന്‍ പാര്‍ക്കാണ് വേദി.
Content Highlight: Maheesh Theekshana becomes 8th Sri Lankan bowler pick a hattrick in ODI format