രാജീവ് ഗാന്ധിയുടെ പേരുവെട്ടിയ മോദിക്ക് ഉദ്ദവിന്റെ മറുപണി; പുതിയ പുരസ്‌കാരത്തിന് രാജീവ് ഗാന്ധിയുടെ പേര്
ഡൂള്‍ന്യൂസ് ഡെസ്‌ക്
Wednesday, 11th August 2021, 1:16 pm
മുംബൈ: രാജീവ് ഗാന്ധിയുടെ പേരില്‍ പുതിയ പുരസ്‌കാരം ഏര്‍പ്പെടുത്തി മഹാരാഷ്ട്രാ സര്‍ക്കാര്‍. ഐ.ടി മേഖലയില്‍ മികച്ച പ്രകടനം കാഴ്ചവെക്കുന്ന കമ്പനികള്‍ക്കാണ് പുരസ്‌കാരം നല്‍കുക.
കായികരംഗത്തെ ഏറ്റവും വലിയ ബഹുമതിയായ രാജീവ് ഗാന്ധി ഖേല്‍ രത്‌ന പുരസ്‌കാരത്തിന്റെ പേര് മാറ്റിയ കേന്ദ്ര സര്‍ക്കാര്‍ തീരുമാനത്തിന് പിന്നാലെയാണ് ഉദ്ദവ് താക്കറെ സര്‍ക്കാറിന്റെ പുതിയ തീരുമാനം.
രാജീവ് ഗാന്ധി ഖേല്‍ രത്‌ന പുരസ്‌കാരത്തിന്റെ പേര് മാറ്റിയ കേന്ദ്ര സര്‍ക്കാര്‍ തീരുമാനത്തെ വിമര്‍ശിച്ച് നേരത്തെ ശിവസേന രംഗത്തുവന്നിരുന്നു.
ജനങ്ങളുടെ തീരുമാനപ്രകാരമുള്ള പേര് മാറ്റമല്ല കേന്ദ്രസര്‍ക്കാര്‍ നടപ്പാക്കിയതെന്നും രാഷ്ട്രീയക്കളി മാത്രമാണ് ഇതിന് പിന്നിലെന്നും ശിവസേനയുടെ മുഖപത്രമായ സാമ്നയില്‍ പറഞ്ഞിരുന്നു.
