ഫുട്‌ബോളിന്റെ ചരിത്രത്തിലെ തന്നെ എക്കാലത്തെയും മികച്ച താരങ്ങളാണ് അര്‍ജന്റൈന്‍ ഇതിഹാസം ലയണല്‍ മെസിയും പോര്‍ച്ചുഗല്‍ ലെജന്‍ഡ് ക്രിസ്റ്റിയാനോ റൊണാള്‍ഡോയും. ഇരുവരെയും കുറിച്ച് ചര്‍ച്ച ചെയ്യപ്പെടാത്ത ഒരു ദിവസം പോലും ഫുട്ബോള്‍ ലോകത്ത് ഉണ്ടാവാന്‍ സാധ്യതയില്ല.
ഫുട്ബോളില്‍ റൊണാള്‍ഡോയെയും മെസിയെയും പോലെ ചെസ്സിലെ ഇതിഹാസമാണ് നോര്‍വീജിയന്‍ ഗ്രാന്‍ഡ് മാസ്റ്ററും ലോക ഒന്നാം നമ്പര്‍ താരവുമായ മാഗ്നസ് കാള്‍സണ്‍. റയല്‍ മാഡ്രിന്റെ ആരാധകനായ ഇദ്ദേഹം ഇഷ്ട ടീമിന്റെ മത്സരങ്ങള്‍ കാണാനായി സ്റ്റേഡിയത്തിലെത്താറുമുണ്ട്.
റയലിന്റെ ഹാര്‍ഡ്‌കോര്‍ ഫാന്‍ ആണെങ്കില്‍ക്കൂടിയും മെസിയാണ് അദ്ദേഹത്തിന്റെ ഏറ്റവും ഇഷ്ടപ്പെട്ട ഫുട്‌ബോളര്‍. റൊണാള്‍ഡോയെക്കാള്‍ മികച്ചത് മെസിയാണെന്നാണ് അദ്ദേഹത്തിന്റെ പക്ഷം.
നേരത്തെ ഫ്ളെക്സ് ഫ്രിഡ്മാന്‍ പോഡ്കാസ്റ്റില്‍ അദ്ദേഹം ഇക്കാര്യം പറഞ്ഞത്. സോക്കറിലെ ഏറ്റവും മികച്ച താരമാരെന്നുള്ള ചോദ്യത്തിനായിരുന്നു ഗ്രാന്‍ഡ് മാസ്റ്ററുടെ മറുപടി.
‘ലയണല്‍ മെസിയല്ലാത്ത മറ്റാരെങ്കിലും ഇത്രത്തോളം മികച്ച ഓള്‍റൗണ്ട് ഗെയിം പുറത്തെടുക്കുമെന്ന് ചിന്തിക്കാന്‍ ബുദ്ധിമുട്ടാണ്,’ അദ്ദേഹം പറഞ്ഞു.
മെസിയാണ് ഇഷ്ടതാരമെങ്കിലും റയല്‍ മാഡ്രിഡിനോടുള്ള തന്റെ ആരാധനയെ കുറിച്ചും കാള്‍സണ്‍ മനസു തുറന്നു.
‘റൊണാള്‍ഡോ റയലിലെത്തുന്നതിന് മുമ്പ് തന്നെ ഞാന്‍ റയലിന്റെ ആരാധകനായിരുന്നു. ഞാന്‍ ഉദ്ദേശിച്ചത് രണ്ടാമത്തെ റൊണാള്‍ഡോയെയാണ്, ആദ്യത്തെയല്ല (റൊണാള്‍ഡോ നസാരിയോ). എനിക്ക് റൊണാള്‍ഡോയെ ഏറെ ഇഷ്ടമാണ്. എന്നാല്‍ മെസിയാണ് മികച്ചവന്‍ എന്നാണ് ഞാന്‍ കരുതുന്നത്,’ താരം പറഞ്ഞു.
എന്നാല്‍ ഒരിക്കല്‍ റൊണാള്‍ഡോയാണ് തന്റെ ഏറ്റവും പ്രിയപ്പെട്ട താരമെന്ന് പറയാന്‍ റയല്‍ മാഡ്രിഡ് നിര്‍ബന്ധിച്ചതായും അദ്ദേഹം പറയുന്നു.
‘ഞാന്‍ ഒരുപാട് റയല്‍ മാഡ്രിഡ് മത്സരങ്ങള്‍ക്ക് പോയിട്ടുണ്ട്. അതെപ്പോഴും എന്നെ സംബന്ധിച്ച് സഹായകരവും മികച്ചതുമായിരുന്നു.
ഒരിക്കല്‍ അവര്‍ പറഞ്ഞു, ഒരു ഇന്റര്‍വ്യൂ നടത്താന്‍ പോവുകയാണ് എന്ന്. എന്റെ ഏറ്റവും പ്രിയപ്പെട്ട താരമാരാണെന്ന് എന്നോട് ചോദിച്ചു. ആ സമയത്ത് ഞാന്‍ മറ്റാരുടെയോ പേര് പറഞ്ഞു, ഇസ്‌കോയുടെ പേരാണ് പറഞ്ഞതെന്നാണ് ഓര്‍മ.
എന്നാല്‍ അവര്‍ കട്ട് പറയുകയും രണ്ടാമത്തെ ടേക്കില്‍ റൊണാള്‍ഡോയുടെ പേര് പറയാന്‍ ആവശ്യപ്പെടുകയുമായിരുന്നു. അവരെ സംബന്ധിച്ച് അത് ഏറെ പ്രധാനപ്പെട്ടതാവും, എന്നാല്‍ എന്നെ സംബന്ധിച്ച് അത് അങ്ങനെയല്ല,’ കാള്‍സണ്‍ പറഞ്ഞു.
Content highlight: Magnus Carlson says Real Madrid forced him to says Cristiano Ronaldo was his favorite player
