ഈക്വല്‍ പെര്‍ഫോമര്‍; ഇതുവരെ കൂടെ അഭിനയിച്ചവരില്‍ ഏറ്റവും മികച്ച നടി ആരാണ്? മറുപടിയുമായി മധു

മലയാളത്തിലെ ഏറ്റവും സീനിയറായ നടനാണ് മധു. സിനിമയുടെ ബ്ലാക്ക് ആന്‍ഡ് വൈറ്റ് കാലത്തിനൊപ്പം സഞ്ചരിച്ച് മലയാളത്തിന്റെ എല്ലാ മാറ്റങ്ങളും അനുഭവിച്ചറിഞ്ഞ അപൂര്‍വം അഭിനേതാക്കളില്‍ ഒരാളാണ് അദ്ദേഹം.

പ്രേം നസീര്‍, സത്യന്‍, ജയന്‍ തുടങ്ങിയ നടന്‍മാര്‍ക്കൊപ്പം എഴുപതുകളില്‍ നിറഞ്ഞു നിന്ന അദ്ദേഹം പിന്നീട് മമ്മൂട്ടി, മോഹന്‍ലാല്‍ തുടങ്ങിയ സൂപ്പര്‍സ്റ്റാറുകള്‍ക്കൊപ്പവും മികച്ച വേഷങ്ങളില്‍ അഭിനയിച്ചിട്ടുണ്ട്.

ഇപ്പോള്‍ കൂടെ അഭിനയിച്ച നായികമാരില്‍ ഈക്വല്‍ പെര്‍ഫോമറായി തോന്നിയിട്ടുള്ളത് ആരെയാണ് എന്ന ചോദ്യത്തിന് മറുപടി നല്‍കുകയാണ് മധു. ഈക്വല്‍ പെര്‍ഫോമറല്ലാത്ത ആരും തന്റെ കൂടെ അഭിനയിച്ചിട്ടില്ലെന്നാണ് നടന്‍ പറയുന്നത്. മൂവി വേള്‍ഡ് മീഡിയക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു മധു.

‘ഈക്വല്‍ പെര്‍ഫോമറല്ലാത്ത ആരും എന്റെ കൂടെ അഭിനയിച്ചിട്ടില്ല. ചിലപ്പോള്‍ ഒന്നോ രണ്ടോ പടത്തില്‍ ചിലര്‍ വന്നുപോയി കാണും. അല്ലാതെ ഉള്ളവരൊക്കെ എന്റെ കൂടെ സ്ഥിരം അഭിനയിക്കുന്ന ആളുകള്‍ തന്നെയായിരുന്നു.

അംബിക, ഷീല, ജയഭാരതി, ശാരദ, ശ്രീവിദ്യ, കെ.ആര്‍. വിജയ അങ്ങനെ കുറേപേരുണ്ട്. ഇവരെയൊക്കെ നോക്കുമ്പോള്‍ ആരാണ് ഇതില്‍ മോശം? അവര്‍ക്ക് പറ്റിയ കഥാപാത്രങ്ങള്‍ തന്നെയാണ് അവര്‍ അഭിനയിക്കാറുള്ളത്.

ചില കുട്ടികള്‍ക്ക് ആദ്യം അഭിനയിക്കാന്‍ വരുമ്പോള്‍ ഡയലോഗ് പറയാനും അഭിനയിക്കാനും വിഷമം തോന്നും. ചിലപ്പോള്‍ അവര്‍ക്ക് നാണമായിരിക്കും. അങ്ങനെയുള്ള സാഹചര്യങ്ങള്‍ അധികം ഉണ്ടായിട്ടില്ല. ഈ പറഞ്ഞവരില്‍ ഏറ്റവും മികച്ച നടി ആരാണെന്ന് ചോദിച്ചാല്‍ ഉത്തരം പറയാന്‍ ആകില്ല.

കാരണം ഓരോരുത്തരും ഓരോ വിധത്തിലാണ് അഭിനയിക്കുക. ശാരദ അഭിനയിക്കുന്ന നല്ല റോളുകള്‍ ശ്രീവിദ്യക്കോ ഷീലക്കോ ചെയ്യാന്‍ ആകില്ല. ഷീല അഭിനയിക്കുന്നത് ശാരദക്കോ ശ്രീവിദ്യക്കോ ചെയ്യാന്‍ സാധിക്കില്ല. അങ്ങനെ തന്നെയാണ് മറ്റുള്ളവരുടെയും കാര്യം.

എല്ലാം വ്യത്യസ്തമായിട്ടുള്ള കഥാപാത്രങ്ങളാണ്. ഒരാള്‍ ചെയ്യുന്ന കഥാപാത്രം നല്ലതാണെന്ന് പറയാം. അല്ലാതെ ആ വ്യക്തി മറ്റേ വ്യക്തിയേക്കാള്‍ മെച്ചമെന്നോ മോശമെന്നോ ഒരിക്കലും പറയാന്‍ പറ്റില്ല. അവരെല്ലാം ഈക്വലി കോളിഫൈഡാണ്. അവിടെ തൂക്കി നോക്കിയിട്ട് കാര്യമില്ല,’ മധു പറയുന്നു.

Content Highlight: Madhu Replied Who is the best actress Or Equal Performer have ever acted with