മോന്‍സന്റെ തട്ടിപ്പ്; ലോക്‌നാഥ് ബെഹ്‌റയുടെ മൊഴിയെടുത്തു
ഡൂള്‍ന്യൂസ് ഡെസ്‌ക്
Monday, 25th October 2021, 10:46 am
കൊച്ചി: പുരാവസ്തു തട്ടിപ്പ് കേസില്‍ അറസ്റ്റിലായ മോന്‍സണ്‍ മാവുങ്കലിന്റെ വീട്ടില്‍ പോയിരുന്ന മുന്‍ ഡി.ജി.പി ലോക്‌നാഥ് ബെഹ്‌റയുടെ മൊഴിയെടുത്തു. എ.ഡി.ജി.പി മനോജ് എബ്രഹാം, ഐ.ജി ലക്ഷ്മണ എന്നിവരുടേയും മൊഴി എടുത്തിട്ടുണ്ട്.
ക്രൈം ബ്രാഞ്ച് എ.ഡി.ജി.പി ശ്രീജിത്താണ് മൊഴിയെടുത്തത്. മോന്‍സന്റെ വീട്ടില്‍ ഇവര്‍ പോയിരുന്നതായി നേരത്തെ വ്യക്തമായിരുന്നു.
ഇതിന്റെ അടിസ്ഥാനത്തിലാണ് മൊഴിയെടുത്തത്. ബെഹ്‌റയ്ക്ക് മോന്‍സണുമായി അടുത്ത ബന്ധമുണ്ടായിരുന്നതായാണ് സൂചന. ഐ.ജി ലക്ഷ്മണ മോന്‍സണെതിരായ കേസ് അട്ടിമറിക്കാന്‍ ശ്രമിച്ചതായും ആരോപണമുയര്‍ന്നിരുന്നു.
മോന്‍സന്റെ വീട്ടില്‍ ബീറ്റ് ബോക്‌സ് വെച്ചതിലും മ്യൂസിയം സന്ദര്‍ശിച്ചതിലും ബെഹ്‌റയോട് വിശദീകരണം തേടിയെന്നാണ് വിവരം.
