സംസാരിക്കാനുള്ള എല്ലാ അവകാശവും പൃഥ്വി എഴുതി വാങ്ങിയെന്ന് ലിസ്റ്റിന്‍; നിങ്ങളുടെ തമാശ കേട്ട് ഇവര്‍ക്ക് തന്നെ ബോറടിച്ചിട്ടുണ്ടെന്ന് പൃഥ്വി; ചിരിപ്പിച്ച് കടുവ ടീം

ഷാജി കൈലാസ്- പൃഥ്വിരാജ് കൂട്ടകെട്ടില്‍ പുറത്തിറങ്ങാനിരിക്കുന്ന ആക്ഷന്‍ മാസ് എന്റര്‍ടെയിന്‍മെന്റ് ചിത്രമാണ് കടുവ. നീണ്ട ഇടവേളക്ക് ശേഷം ഷാജി കൈലാസ് സിനിമാരംഗത്തേക്ക് തിരിച്ചെത്തുന്നു എന്ന പ്രത്യേകതയും ചിത്രത്തിനുണ്ട്. ജൂലൈ ഏഴിനാണ് ചിത്രം തിയേറ്ററുകളില്‍ റിലീസ് ചെയ്യുന്നത്.

മലയാളത്തിന് പുറമേ തമിഴ്, കന്നഡ, തെലുങ്ക്, ഹിന്ദി ഭാഷകളില്‍ പുറത്തിറങ്ങാനിരിക്കുന്ന ചിത്രത്തിന്റെ പ്രൊമോഷന്‍ കഴിഞ്ഞ ദിവസം കൊച്ചിയില്‍ വെച്ച് നടന്നിരുന്നു.

പ്രൊമോഷന്‍ പരിപാടിയില്‍ വെച്ച് പൃഥ്വിരാജും ചിത്രത്തിന്റെ നിര്‍മാതാവായ ലിസ്റ്റിന്‍ സ്റ്റീഫനും തമ്മിലുള്ള നര്‍മസംഭാഷണങ്ങളാണ് ഇപ്പോള്‍ ശ്രദ്ധ നേടുന്നത്. സിനിമയെക്കുറിച്ചും വെല്‍കം സ്പീച്ചിനും വേണ്ടി ലിസ്റ്റിന്‍ സ്റ്റീഫനെ അവതാരകന്‍ ക്ഷണിച്ചപ്പോഴാണ് രസകരമായ കമന്റുകളുണ്ടായത്.

”സംസാരിക്കാനുള്ള എല്ലാ അവകാശങ്ങളെയും കുറിച്ച് ഞാനും പൃഥ്വിരാജുമായി ധാരണയിലെത്തിയിട്ടുണ്ട്. രാജു മുമ്പേ പറഞ്ഞു, മൂന്ന് എഗ്രിമെന്റ് വെച്ചിട്ടുണ്ടെന്ന്.

ആ എഗ്രിമെന്റില്‍ തന്നെയുണ്ട്, സംസാരിക്കാനുള്ള എല്ലാ അവകാശങ്ങളും പുള്ളി തന്നെ എഴുതി വാങ്ങിച്ചിട്ടുണ്ട്. അതുകൊണ്ട് പുള്ളി തന്നെ അതെല്ലാം ക്ലാരിഫൈ ചെയ്യുന്നതാണ്,” ലിസ്റ്റിന്‍ സ്റ്റീഫന്‍ പറഞ്ഞു.

”നിങ്ങളുടെ കോമഡി ഇപ്പൊ ഇവര്‍ക്കും ബോറടിച്ച് തുടങ്ങിയിട്ടുണ്ട്,” എന്നായിരുന്നു പൃഥ്വിരാജ് ഇതിന് നല്‍കിയ കമന്റ്.

”അതില്‍ നിന്ന് തന്നെ തുടങ്ങാം എന്ന് ഓര്‍ത്തിട്ടാ,” എന്ന് ലിസ്റ്റിന്‍ ഇതിന് മറുപടി കമന്റും നല്‍കുന്നുണ്ട്.

സിനിമയുടെ ബഡ്ജറ്റിനെക്കുറിച്ചും ലിസ്റ്റിന്‍ സ്റ്റീഫന്‍ സംസാരിക്കുന്നുണ്ട്.

”ഞാന്‍ കുറേയധികം സിനിമകള്‍ നിര്‍മിച്ചിട്ടുണ്ട്. ഇതുവരെ നിര്‍മിച്ച സിനിമകളില്‍ ഏറ്റവും ബഡ്ജറ്റ് കൂടിയ സിനിമയാണ് കടുവ. കാരണം ഫൈറ്റുകള്‍ കൂടുതലുണ്ട്, ഒത്തിരി ആര്‍ടിസ്റ്റുകളുണ്ട്, ഒത്തിരി ദിവസം ഷൂട്ട് ചെയ്ത സിനിമയാണ്.

കൊവിഡിന്റെ ഏറ്റവും പീക് ടൈമില്‍ സ്റ്റാര്‍ട്ട് ചെയ്ത സിനിമയാണ്. അതുകൊണ്ട് കുറേ ഷെഡ്യൂളുകള്‍ എടുത്തിട്ടുണ്ട്,” ലിസ്റ്റിന്‍ കൂട്ടിച്ചേര്‍ത്തു.

ലിസ്റ്റിന്‍ സ്റ്റീഫനും സുപ്രിയ മേനോനും ചേര്‍ന്ന് മാജിക് ഫ്രെയിംസ്, പൃഥ്വിരാജ് പ്രൊഡക്ഷന്‍സ് എന്നിവയുടെ ബാനറിലാണ് കടുവ നിര്‍മിക്കുന്നത്. ലൂസിഫറിന് ശേഷം വിവേക് ഒബ്‌റോയ് വില്ലന്‍ വേഷത്തില്‍ എത്തുന്ന മലയാള ചിത്രം കൂടിയാണ് കടുവ. സംയുക്ത മേനോനാണ് ചിത്രത്തില്‍ നായികയായെത്തുന്നത്.

ജൂണ്‍ 30ന് റിലീസ് ചെയ്യാനിരുന്ന ചിത്രം പിന്നീട് ജൂലൈ ഏഴിലേക്ക് മാറ്റി വെക്കുകയായിരുന്നു. കടുവക്കുന്നേല്‍ കുറുവച്ചന്‍ എന്ന കഥാപാത്രമായാണ് പൃഥ്വിരാജ് എത്തുന്നത്. ജിനു എബ്രഹാമാണ് ‘കടുവ’യുടെ രചന നിര്‍വഹിച്ചിരിക്കുന്നത്.

സായ് കുമാര്‍, സിദ്ദിഖ്, ജനാര്‍ദ്ദനന്‍, വിജയരാഘവന്‍, അജു വര്‍ഗീസ്, ഹരിശ്രീ അശോകന്‍, രാഹുല്‍ മാധവ്, കൊച്ചുപ്രേമന്‍, സീമ, പ്രിയങ്ക തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. ജേക്ക്‌സ് ബിജോയാണ് ചിത്രത്തിന്റെ സംഗീത സംവിധാനം.

Content Highlight: Listin Stephen- Prithviraj Sukumaran funny conversation during Kaduva movie promotion