ബാഴ്‌സലോണയില്‍ നിന്ന് വിടവാങ്ങാനൊരുങ്ങുന്ന ജോര്‍ധി ആല്‍ബക്ക് സന്ദേശവുമായി ലയണല്‍ മെസി. ബാഴ്‌സലോണയില്‍ ആല്‍ബക്കൊപ്പം മനോഹരമായ അധ്യായങ്ങള്‍ തീര്‍ത്തതിന് ശേഷമാണ് മെസി പാരീസിയന്‍ ക്ലബ്ബിലേക്ക് ചേക്കേറിയത്.
ബാഴ്‌സയിലെ തന്റെ അടുത്ത സുഹൃത്തായിരുന്ന ആല്‍ബക്ക് ഇന്‍സ്റ്റഗ്രാമിലൂടെ ആശംസ അറിയിച്ചിരിക്കുകയാണ് മെസി. ബ്ലൂഗ്രാനയില്‍ ഇരുവരും ഒരുമിച്ച് പങ്കുവെച്ച നിമിഷങ്ങളുടെ ചിത്രങ്ങള്‍ പങ്കുവെച്ചുകൊണ്ടായിരുന്നു മെസി ആശംസ സന്ദേശം കുറിച്ചത്. ആല്‍ബ സഹതാരം മാത്രമായിരുന്നില്ലെന്നും അതിനപ്പുറത്തേക്ക് ഒരു ബന്ധം അദ്ദേഹവുമായിട്ടുണ്ടായിരുന്നെന്നും മെസി കുറിപ്പില്‍ പറയുന്നു.
‘നിങ്ങളെനിക്ക് ഒരു സഹതാരം മാത്രമായിരുന്നില്ല. കളത്തില്‍ ഒരു യഥാര്‍ത്ഥ പങ്കാളിയായിരുന്നു. നമുക്ക് വ്യക്തിപരമായി നല്ല മുഹൂര്‍ത്തങ്ങള്‍ ചെലവഴിക്കാനായതില്‍ ഞാന്‍ ഒത്തിരി സന്തോഷവാനാണ്. നിങ്ങളുടെ പുതിയ ചുവടുവെപ്പ് ജീവത്തില്‍ ജയവും സന്തോഷവും കൊണ്ടുവരട്ടെ. നിങ്ങള്‍ക്കും കുടുംബത്തിനും ആശംസകള്‍ നേരുന്നു. എല്ലാത്തിനും നന്ദി, ജോര്‍ധി,’ മെസി കുറിച്ചു.
അതേസമയം, നീണ്ട പതിനൊന്ന് വര്‍ഷം ബാഴ്‌സലോണയില്‍ ചെലവഴിച്ച ആല്‍ബ കഴിഞ്ഞ ദിവസം ക്ലബ്ബില്‍ നിന്ന് പടിയിറങ്ങുകയാണെന്ന് അറിയിക്കുകയായിരുന്നു. 2024 വരെയാണ് ആല്‍ബക്ക് ബാഴ്സയുമായി കരാറുണ്ടായിരുന്നത്. എന്നാല്‍ ഈ സീസണിന്റെ അവസാനത്തോടെ താരം ക്യാമ്പ് നൗ വിടാന്‍ തീരുമാനിക്കുകയായിരുന്നു. പ്രശസ്ത ഫുട്ബോള്‍ ജേണലിസ്റ്റും ട്രാന്‍സ്ഫര്‍ എക്സ്പര്‍ട്ടുമായ ഫാബ്രിസിയോ റൊമാനോയാണ് ഇക്കാര്യം റിപ്പോര്‍ട്ട് ചെയ്തത്.
വേതനത്തെ ചൊല്ലിയാണ് ബാഴ്സ വിടാന്‍ ആല്‍ബ തീരുമാനിച്ചതെന്നാണ് റിപ്പോര്‍ട്ടുകളില്‍ പറയുന്നത്. എന്നാല്‍ ബാഴ്സയുമായി പിരിയുന്നെന്ന വിവരം താരം തന്നെയാണ് ആരാധകരെ അറിയിച്ചത്. സെര്‍ജിയോ ബുസ്‌ക്വെറ്റ്സിന് പിന്നാലെയുള്ള ആല്‍ബയുടെ പടിയിറക്കം ഒരു യുഗാന്ത്യമായാണ് ബാഴ്സ ആരാധകര്‍ അടയാളപ്പെടുത്തുക.
2012ല്‍ 12 മില്യണ്‍ യൂറോ വേതനം നല്‍കിയാണ് ആല്‍ബയെ ബാഴ്സലോണ ക്ലബ്ബിലെത്തിച്ചത്. ഇക്കാലയളവിനുള്ളില്‍ താരം 456 മത്സരങ്ങളില്‍ ക്ലബ്ബിനായി ബൂട്ടുകെട്ടിയിട്ടുണ്ട്. 27 ഗോളുകളും 99 അസിസ്റ്റുകളുമാണ് ബാഴ്‌സലോണക്കായി ആല്‍ബ അക്കൗണ്ടിലാക്കിയത്. ബാഴ്സലോണ ഇതിഹാസം ലയണല്‍ മെസിക്കൊപ്പം ആല്‍ബ 345 മത്സരങ്ങള്‍ കളിച്ചിട്ടുണ്ട്.
Content Highlights: Lionel Messi’s Instagram post about Jordi Alba goes viral