ക്രിസ്റ്റ്യാനോ റൊണാള്‍ഡോയെ പ്രശംസിച്ച് ലയണല്‍ മെസി. 2020ല്‍ മെസി ബാഴ്സലോണയിലും ക്രിസ്റ്റ്യാനോ യുവന്റസിനുമായി കളിക്കുന്ന സമയത്ത് അദ്ദേഹം പറഞ്ഞ വാചകങ്ങള്‍ ഒരിക്കല്‍ കൂടി ശ്രദ്ധ നേടുകയാണിപ്പോള്‍.
ഓരോ കായികയിനത്തിലും കൂടുതല്‍ അഭിനന്ദനം അര്‍ഹിക്കുന്ന ഒരു താരമുണ്ടാകുമെന്നും ഫുട്ബോളില് അത് റൊണാള്‍ഡോയാണെന്നുമാണ് മെസി പറഞ്ഞത്. ലാ സെക്സറ്റയോടാണ് മെസി ഇക്കാര്യങ്ങള്‍ പങ്കുവെച്ചത്.
‘അഭിനന്ദിക്കപ്പെടേണ്ട നിരവധി താരങ്ങളുണ്ട്. നദാല്‍, ഫെഡറര്‍, ലിബ്രോണ്‍ അങ്ങനെ എല്ലാ കായിക ഇനത്തിലും മികച്ച പ്രകടനം കൊണ്ട് വേറിട്ടുനില്‍ക്കുന്ന ഒരു താരം ഉണ്ടാകും. ഫുട്ബോളില് അത് ക്രിസ്റ്റിയാനോയാണ്. അതുപോലെ നിരവധി താരങ്ങളുണ്ട്, കൂടുതല്‍ മികവ് പുലര്‍ത്തി പ്രശംസ നേടുന്നവര്‍,’ മെസി പറഞ്ഞു.
രണ്ട് വര്‍ഷത്തെ കരാറില്‍ 200 മില്യണ്‍ യൂറോ വേതനം നല്‍കിയാണ് അല്‍ നസര്‍ താരത്തെ സൈന്‍ ചെയ്യിച്ചത്. സൗദി പ്രോ ലീഗില്‍ അല്‍ നസറിനെ മുന്‍ പന്തിയില്‍ എത്തിക്കുക എന്ന ലക്ഷ്യത്തോടെയാണ് ലോക ഫുട്‌ബോളര്‍മാര്‍ക്ക് ലഭിക്കുന്നതില്‍ ഏറ്റവും ഉയര്‍ന്ന മൂല്യം നല്‍കി താരത്തെ അല്‍ നസര്‍ സ്വന്തമാക്കിയത്.
ഈ സീസണിന്റെ അവസാനത്തോടെ ഫ്രഞ്ച് വമ്പന്‍ ക്ലബ്ബായ പി.എസ്.ജിയുമായി പിരിഞ്ഞ മെസി അമേരിക്കന്‍ ക്ലബ്ബിലേക്ക് ചേക്കേറുകയായിരുന്നു. യൂറോപ്യന്‍ ലീഗില്‍ നിന്ന് ഇടവേളയെടുത്ത താരം ഡേവിഡ് ബെക്കാമിന്റെ ഉടമസ്ഥതയിലുള്ള ഇന്റര്‍ മയാമിയില്‍ ചേരുകയായിരുന്നു. രണ്ട് വര്‍ഷത്തെ കരാറിലാണ് മെസി ഇന്റര്‍ മയാമിയുമായി സൈന്‍ ചെയ്തത്.
