2021ല്‍ ആമസോണ്‍ പ്രൈമിലൂടെ റിലീസ് ചെയ്യപ്പെട്ട ഒരു തമിഴ് ചിത്രമാണ് ജയ് ഭീം. 2ഡി എന്റര്‍ടൈന്‍മെന്റിന് കീഴില്‍ സൂര്യയും ജ്യോതികയും ചേര്‍ന്നാണ് ഈ സിനിമ നിര്‍മിച്ചത്. സൂര്യ അഭിഭാഷകനായ കെ. ചന്ദ്രുവായി എത്തിയ ജയ് ഭീമില്‍ ലിജോമോള്‍ ജോസും ഒരു പ്രധാനവേഷത്തില്‍ എത്തിയിരുന്നു.

റിലീസിന് പിന്നാലെ ഈ സിനിമയിലെ ലിജോമോളുടെ കഥാപാത്രം ഏറെ പ്രശംസ നേടിയിരുന്നു. എന്നാല്‍ ജയ് ഭീമിന് മുമ്പ് തനിക്കൊരു ബ്രേക്ക് വന്നിരുന്നുവെന്ന് പറയുകയാണ് ലിജോമോള്‍.

മലയാളത്തിലും തമിഴിലും താന്‍ ഏകദേശം ഒരു വര്‍ഷത്തിന് മേലെ സിനിമകളൊന്നും ചെയ്തിട്ടില്ലെന്നും ആ സമയത്ത് സിനിമ വേണ്ടെന്ന് തീരുമാനിച്ച് നെറ്റിന് തയ്യാറെടുക്കുകയായിരുന്നെന്നും നടി പറയുന്നു. വണ്ടര്‍വാള്‍ മീഡിയക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു ലിജോമോള്‍.

‘ജയ് ഭീമിന് മുമ്പ് എനിക്കൊരു ബ്രേക്ക് വന്നിരുന്നു. മലയാളത്തിലും തമിഴിലും ഞാന്‍ ഏകദേശം ഒരു വര്‍ഷത്തിന് മേലെ സിനിമകളൊന്നും ചെയ്തിട്ടില്ല. ഞാന്‍ ആ സമയത്ത് സിനിമ വേണ്ടെന്ന് തീരുമാനിച്ച് നിര്‍ത്തിയിട്ട് നെറ്റിന് പ്രിപ്പേര്‍ ചെയ്യുകയായിരുന്നു.

വീണ്ടും ഒന്നുകൂടെ പി.എച്ച്.ഡിക്ക് ട്രൈ ചെയ്യാമെന്ന് കരുതുകയായിരുന്നു. ജെ.ആര്‍.എഫ് എടുക്കാന്‍ പറ്റുകയാണെങ്കില്‍ അങ്ങനെ പോകാമെന്നും കരുതി. ആ സമയത്താണ് ജയ് ഭീമിന്റെ ഓഡീഷന് വിളിക്കുന്നത്. അതിന് മുമ്പ് ഞാന്‍ തമിഴില്‍ ഒരു സിനിമ ചെയ്തിരുന്നു. സിവപ്പ് മഞ്ചള്‍ പച്ചൈ എന്നായിരുന്നു ആ സിനിമയുടെ പേര്.

അത് കണ്ടിട്ടാണ് എന്നെ ജയ് ഭീമിലേക്ക് വിളിക്കുന്നത്. സത്യത്തില്‍ ആ സിനിമ ഇറങ്ങിയിട്ട് കുറച്ച് നാളുകളായിരുന്നു. പക്ഷെ എങ്ങനെയോ അപ്പോഴാണ് സംവിധായകന്‍ ആ സിനിമ കാണുന്നത്. ആദ്യത്തെ ഓഡീഷന് വിളിക്കുമ്പോള്‍ ഞാന്‍ പോകുന്നതിനെ കുറിച്ച് ആലോചിച്ചിരുന്നില്ല. ഞാന്‍ അവരോട് വരാമെന്നൊന്നും പറഞ്ഞിരുന്നില്ല.

അത് കഴിഞ്ഞ് പിന്നെയും അവിടുന്ന് കോള് വന്നു. അവര് സീനൊക്കെ അയച്ച് തന്നു. ആ സമയത്ത് സൂര്യയുടെ സിനിമ ആണെന്നൊന്നും പറഞ്ഞിരുന്നില്ല. റ്റു.ഡി എന്റര്‍ടൈമെന്റ്സ് പ്രൊഡ്യൂസ് ചെയ്യുന്നുവെന്ന് മാത്രമേ പറഞ്ഞിരുന്നുള്ളൂ. ഒരു ചെറിയ സിനിമയെന്നും പറഞ്ഞു,’ ലിജോമോള്‍ പറയുന്നു.

Content Highlight: Lijomol Jose Talks About Jai Bhim