കൊച്ചി: ജല്ലിക്കട്ടിന് ശേഷം ലിജോ ജോസ് പെല്ലിശ്ശേരി സംവിധാനം ചെയ്യുന്ന പുതിയ ചിത്രം ‘ചുരുളി’യുടെ ട്രെയ്ലര് കഴിഞ്ഞ ദിവസമാണ് പുറത്തുവിട്ടത്. യൂട്യൂബ് ട്രെന്റിംഗില്‍ ഇപ്പോഴും ചുരുളിയുടെ ട്രെയ്ലര് നിറഞ്ഞു നില്‍ക്കുന്നുണ്ട്.
ഇപ്പോഴിതാ ചിത്രം ഇന്ന് റിലീസ് ചെയ്‌തേക്കും എന്നുള്ള അഭ്യൂഹങ്ങളാണ് സോഷ്യല്‍ മീഡിയില്‍ മുഴുവന്‍. ലിജോ പങ്കുവെച്ച ചുരുളിയുടെ പോസ്റ്ററുകളാണ് ഈ സംശയത്തിന് ആക്കം കൂട്ടിയത്.
നേരത്തെ ട്രെയ് ലര്‍ റിലീസ് ചെയ്യുന്നതിന് മുമ്പ് ഒരു പോസ്റ്ററും ഇന്ന് ആറ് മണിക്ക് എന്ന ക്യാപ്ഷനും മാത്രമായിരുന്നു ഉണ്ടായിരുന്നത്. ഇപ്പോള്‍ പുറത്തുവിട്ട പോസ്റ്ററിലും ഇന്ന് ആറ് മണിക്ക് എന്നാണുള്ളത്. ഇതോടെയാണ് ഇന്ന് സിനിമ റിലീസ് ചെയ്‌തേക്കുമെന്ന രീതിയില്‍ പ്രചാരണം സോഷ്യല്‍ മീഡിയയില്‍ ആരംഭിച്ചത്.
ലിജോയുടെ പോസ്റ്റിന് കമന്റുകളായി നിരവധി പേരാണ് ഈക്കാര്യം ചോദിച്ച് എത്തിയിരിക്കുന്നത്. അതേസമയം സിനിമ എവിടെ റിലീസ് ചെയ്യുമെന്നോ എന്ന് റിലീസ് ചെയ്യുമെന്നോ ഔദ്യോഗികമായി ഒരു വിശദീകരണവും അണിയറ പ്രവര്‍ത്തകരുടെ അടുത്ത് നിന്ന് എത്തിയിട്ടില്ല.
ചെമ്പന്‍ വിനോദ് ജോസ്, വിനയ് ഫോര്‍ട്ട്, ജോജു ജോര്‍ജ്, ജാഫര്‍ ഇടുക്കി തുടങ്ങിയവരാണ് ചുരുളിയില്‍ പ്രധാന വേഷത്തില്‍ എത്തുന്നത്. നിഗൂഢത നിറഞ്ഞ ട്രെയ്ലര് പതിനെട്ട് വയസിന് മുകളിലുള്ളവര്‍ക്കുള്ളതാണ് എന്ന മുന്നറിപ്പോടെയാണ് കഴിഞ്ഞ ദിവസം എത്തിയത്. വിനോയ് തോമസിന്റെ കഥയ്ക്ക് അവലംബിത തിരക്കഥ തയ്യാറാക്കിയിരിക്കുന്നത് എസ് ഹരീഷ് ആണ്.
ലിജോ ജോസ് പെല്ലിശ്ശേരിയും ചെമ്പന്‍ വിനോദ് ജോസും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്. മധു നീലകണ്ഠന്‍ ആണ് ക്യാമറ. എഡിറ്റിംഗ് ദീപു ജോസഫ്. സൗണ്ട് ഡിസൈന്‍ രംഗനാഥ് രവി. ചീഫ് അസോസിയേറ്റ് ഡയറക്ടര്‍ ടിനു പാപ്പച്ചന്‍. അനിമേഷന്‍ ഡയറക്ടര്‍ ബലറാം ജെ. ഡിസൈന്‍സ് ഓള്‍ഡ് മങ്ക്സ്.
നേരത്തെ തനിക്ക് ഇഷ്ടമുള്ള പ്ലാറ്റ് ഫോമില്‍ സിനിമ പ്രദര്‍ശിപ്പിക്കുമെന്നും കലാകാരന്മാരുടെ ആത്മാഭിമാനം ചോദ്യം ചെയ്യാന്‍ നില്‍ക്കരുതെന്നും ലിജോ പറഞ്ഞിരുന്നു. തന്നെ സംബന്ധിച്ച് സിനിമ പണം സമ്പാദിക്കാനുള്ള യന്ത്രമല്ലെന്നും മറിച്ച് തന്റെ കാഴ്ചപ്പാട് പ്രകടിപ്പിക്കാനുള്ള ഒരു മാധ്യമമാണെന്നും പറഞ്ഞ ലിജോ സിനിമയില്‍ നിന്ന് സ്വരൂപിക്കുന്ന പണം മുഴുവന്‍ മികച്ച സിനിമയക്കായി വിനിയോഗിക്കുമെന്നും തനിക്ക് ശരിയാണ് എന്ന് തോന്നുന്നിടത്ത് സിനിമ പ്രദര്‍ശിപ്പിക്കുമെന്നും ലിജോ ജോസ് പറഞ്ഞിരുന്നു.
തന്റെ പുതിയ സിനിമയുടെ ഷൂട്ടിംഗ് ജൂലായ് ഒന്നു മുതല്‍ ആരംഭിക്കുമെന്ന് നേരത്തെ ലിജോ ജോസ് പ്രഖ്യാപിച്ചിരുന്നു. സിനിമയുടെ ഫസ്റ്റ് ലുക്ക് പോസ്റ്റും ലിജോ പങ്കുവെച്ചിരുന്നു.സിനിമാ ചിത്രീകരണം തുടങ്ങരുതെന്ന ചലച്ചിത്ര സംഘടനകളുടെ നിര്‍ദ്ദേശം നിലനില്‍ക്കെ ഞാനൊരു സിനിമ പിടിക്കാന്‍ പോകുവാടാ ആരാടാ തടയാന്‍ എന്ന് നേരത്തെ ലിജോ ജോസ് ഫേസ്ബുക്കില്‍ കുറിച്ചിരുന്നു.
ഡൂള്‍ന്യൂസിനെ ഫേസ്ബുക്ക്, ടെലഗ്രാം, ഹലോ പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക.