ഇ.ഡി വാദം തള്ളി; ലൈഫ് മിഷന്‍ കേസില്‍ എം. ശിവശങ്കറിന് ഇടക്കാല ജാമ്യം
ഡൂള്‍ന്യൂസ് ഡെസ്‌ക്
Wednesday, 2nd August 2023, 12:03 pm
ന്യൂദല്‍ഹി: ലൈഫ് മിഷന്‍ കേസില്‍ മുഖ്യമന്ത്രിയുടെ മുന്‍ പ്രിന്‍സിപ്പൽ സെക്രട്ടറി എം. ശിവശങ്കറിന് ഇടക്കാല ജാമ്യം. ചികിത്സാവശ്യാര്‍ത്ഥം രണ്ട് മാസത്തേക്കാണ് സുപ്രീം കോടതി ജാമ്യം അനുവദിച്ചത്. കസ്റ്റഡിയില്‍വെച്ച് ശസ്ത്രക്രിയ നടത്താമെന്നുള്ള ഇ.ഡി വാദം കോടതി തള്ളുകയായിരുന്നു.
വിശദമായ വാദത്തിന് ശേഷമാണ് സുപ്രീം കോടതി ജാമ്യം അനുവദിച്ചത്. നേരത്തെ സമാന ആവശ്യം ഉന്നയിച്ച് ശിവശങ്കര്‍ ഹൈക്കോടതിയെ സമീപിച്ചിരുന്നെങ്കിലും ജാമ്യം ലഭിച്ചിരുന്നില്ല.
ഇതിനെതിരെയാണ് ശിവശങ്കര്‍ സുപ്രീം കോടതിയെ സമീപിച്ചിരുന്ന്. ഗുരുതരമായ ആരോഗ്യ പ്രശ്‌നങ്ങളുണ്ടെന്നായിരുന്നു ഇദ്ദേഹം നല്‍കിയ ഹരജിയില്‍ പറഞ്ഞിരുന്നത്. എറണാകുളം മെഡിക്കല്‍ കോളേജ് ആശുപത്രിയില്‍ നിന്നുള്ള മെഡിക്കല്‍ റിപ്പോര്‍ട്ടും ശിവശങ്കറിന്റെ അഭിഭാഷകന്‍ കോടതിയില്‍ ഹാജരാക്കി.
