നാലാമത്തെ കുട്ടിയ്ക്ക് ബിഷപ്പുമാര്‍ മാമോദീസ നടത്തും; കൂടുതല്‍ കുട്ടികളുള്ള കുടുംബങ്ങള്‍ക്ക് സഹായം പ്രഖ്യാപിച്ച് തിരുവനന്തപുരം ലത്തീന്‍ സഭയും
ഡൂള്‍ന്യൂസ് ഡെസ്‌ക്
Wednesday, 11th August 2021, 4:51 pm
തിരുവനന്തപുരം: കൂടുതല്‍ കുട്ടികളുള്ള കുടുംബങ്ങള്‍ക്ക് സഹായം നല്‍കുമെന്ന് തിരുവനന്തപുരം ലത്തീന്‍ അതിരൂപതയും. അതിരൂപതയ്ക്ക് കീഴിലുള്ള കുടുംബങ്ങളിലെ നാലാമത്തെ കുട്ടിക്ക് ഇനി മുതല്‍ ബിഷപ്പുമാര്‍ മാമോദീസ ചടങ്ങ് നടത്തും.
കൂടുതല്‍ അംഗങ്ങളുള്ള കുടുംബത്തിലെ കുട്ടികള്‍ക്ക് ലത്തീന്‍ അതിരൂപത അധ്യക്ഷന്‍ ആര്‍ച്ച് ഡോ. എം. സൂസപാക്യമോ സഹായ മെത്രാന്‍ ഡോ. ആര്‍. ക്രിസ്തുദാസോ പ്രാരംഭ കൂദാശ നല്‍കുമെന്നും സഭ അറിയിച്ചു.
ഇതിന്റെ തുടക്കമെന്നോണം ഓഗസ്റ്റ് 23 ന് വെള്ളയമ്പലം സെന്റ് തെരേസാസ് പള്ളിയില്‍ ബിഷപ്പ് ഡോ. ആര്‍. ക്രിസ്തുദാസ് തെരെഞ്ഞെടുത്ത കുട്ടികള്‍ക്ക് മാമോദീസ നല്‍കും.
നേരത്തെ 2000ത്തിന് ശേഷം വിവാഹിതരായ അഞ്ചു കുട്ടികളില്‍ കൂടുതല്‍ ഉള്ള കുടുംബത്തിന് പ്രതിമാസം 1500 രൂപ സാമ്പത്തിക സഹായം നല്‍കുമെന്ന് കത്തോലിക്കാ സഭ പ്രഖ്യാപിച്ചത് വലിയ വിവാദമായിരുന്നു.
