കോഴിക്കോട്: ബുധനാഴ്ച രാത്രി സംസ്ഥാനത്ത് പെയ്ത കനത്ത മഴയില്‍ വ്യാപക നാശനഷ്ടങ്ങള്‍ രേഖപ്പെടുത്തി. കോഴിക്കോട് ജില്ലയിലെ മലയോര മേഖലയില്‍ പലയിടത്തും ശക്തമായ ഉരുള്‍പ്പൊട്ടല്‍ ഉണ്ടായി.
കോഴിക്കോട്- കൊല്ലഗല്‍ പാതയില്‍ താമരശ്ശേരി ചുരത്തില്‍ മരം വീണ് ഗതാഗതം തടസ്സപ്പെട്ടു. അതേസമയം കക്കയം ടൗണിന് സമീപമാണ് ഉരുള്‍പ്പൊട്ടല്‍ ഉണ്ടായത്.
കോഴിക്കോട് ജില്ലയില്‍ അഞ്ചിടങ്ങളിലാണ് ഉരുള്‍പ്പൊട്ടിയത്. കരിഞ്ചോലയില്‍ ഉണ്ടായ ഉരുള്‍പ്പൊട്ടലില്‍ വീടിനുള്ളില്‍ക്കുടുങ്ങിയ 9 വയസ്സുകാരിയെ മരിച്ച നിലയില്‍ കണ്ടെത്തി.
തൃശ്ശൂര്‍ ജില്ലയുടെ മലയോരമേഖലയില്‍ കനത്തമഴ തുടര്‍ന്നുകൊണ്ടിരിക്കുകയാണ്. മഴ ശക്തമായതിനെത്തുടര്‍ന്ന് പെരിങ്ങള്‍ക്കൂത്ത് ഡാമിന്റെ ഷട്ടറുകള്‍ എല്ലാം തുറന്നുവിട്ടതായി കെ.എസ്.ഇ.ബി അറിയിച്ചു.