ചിരാഗും തേജസ്വിയും ഒന്നിക്കണം; ബീഹാറില്‍ തന്ത്രങ്ങള്‍ മെനഞ്ഞ് ലാലുപ്രസാദ്
ഡൂള്‍ന്യൂസ് ഡെസ്‌ക്
Tuesday, 3rd August 2021, 7:23 pm
പട്‌ന: എല്‍.ജെ.പി നേതാവ് ചിരാഗ് പാസ്വാനും ആര്‍.ജെ.ഡി നേതാവും തന്റെ മകനുമായ തേജസ്വി യാദവും സംസ്ഥാനത്ത് സഖ്യമുണ്ടാക്കണമെന്ന് ലാലുപ്രസാദ് യാദവ്. എല്‍.ജെ.പിയിലെ ഭിന്നതയില്‍ എന്ത് സംഭവിച്ചാലും പാര്‍ട്ടി നേതാവായി ചിരാഗ് തന്നെ തുടരുമെന്നും അദ്ദേഹം കൂട്ടിച്ചേര്‍ത്തു.
ചിരാഗും പശുപതി കുമാര്‍ പരാസും തമ്മില്‍ പാര്‍ട്ടി നേതൃസ്ഥാനത്തെ ചൊല്ലിയുള്ള തര്‍ക്കങ്ങള്‍ തുടരുന്നതിനിടയിലാണ് ലാലുവിന്റെ അഭിപ്രായ പ്രകടനം.
ബീഹാര്‍ തെരഞ്ഞെടുപ്പില്‍ ബി.ജെ.പി-ജെ.ഡി.യു സഖ്യം 10 ലേറെ സീറ്റുകളില്‍ അട്ടിമറി നടത്തിയെന്നും ലാലു ആരോപിച്ചു.
നേരത്തെ തേജസ്വി യാദവ് ചിരാഗ് പാസ്വാനുമായി സംസാരിക്കുകയും അദ്ദേഹത്തിന് വേണ്ടി പരസ്യമായി രംഗത്തെത്തുകയും ചെയ്തിരുന്നു. പശുപതി പരസും അനുയായികളും ഉള്ള വിഭാഗത്തെയാണ് ബി.ജെ.പി പിന്തുണയ്ക്കുന്നത്.
