സെലിബ്രിറ്റികള്‍ പറയുന്ന ചില വാക്കുകള്‍ സോഷ്യല്‍ മീഡിയയില്‍ ട്രെന്‍ഡിങ്ങാവുകയും അത് പിന്നീട് ട്രോളാവുകയും ചെയ്യുന്നത് ഇപ്പോള്‍ സാധാരണമാണ്. എന്തിന്, സാധാരണക്കാരന്റെ വാക്കുകള്‍ വരെ ഇന്ന് ട്രോളുകള്‍ക്ക് ആയുധമാണ്.
മോഹന്‍ലാല്‍ ചിത്രം ആറാട്ട് ഇറങ്ങിയ സമയത്ത് മോഹന്‍ലാലിന്റെ കടുത്ത ആരാധകന്‍ ‘ലാലേട്ടന്റെ ആറാട്ടാണ്’ എന്ന് പറഞ്ഞത് സോഷ്യല്‍ മീഡിയയില്‍ ട്രോളായിരുന്നു. പിന്നാലെ ഇയാള്‍ക്ക് ആറാട്ടണ്ണന്‍ എന്ന പേരും വീണിരുന്നു.
അടുത്തിടെ സോഷ്യല്‍ മീഡിയയില്‍ ഇത്തരത്തില്‍ തരംഗമായത് അന്യന്‍ കാണ് എന്ന ട്രോളാണ്. ദേശീയ ചലച്ചിത്ര പുരസ്‌കാര പ്രഖ്യാപനത്തിന് പിന്നാലെയാണ് അന്യന്‍ ട്രോളുകള്‍ സോഷ്യല്‍ മീഡിയയില്‍ തരംഗമായത്.
ഇപ്പോഴിതാ പുതിയ ട്രോള്‍ തരംഗമെത്തിയിരിക്കുകയാണ്. പൃഥ്വിരാജാണ് ഇത്തവണ ട്രോളന്മാരുടെ ഇരയായത്. കഴിഞ്ഞ ദിവസം ജന ഗണ മന എന്ന ചിത്രത്തിന്റെ സക്‌സസ് സെലിബ്രേഷനിടയില്‍ കുഞ്ചാക്കോ ബോബനെ കണ്ടപ്പോള്‍ പൃഥ്വിരാജ് കാഷ്വലായി ലാലേട്ടനെ കാണാന്‍ പോകണമെന്ന് പറഞ്ഞിരുന്നു. ഇതിന്റെ വീഡിയോ സോഷ്യല്‍ മീഡിയയില്‍ വൈറലായിരുന്നു. ജന ഗണ മന സക്‌സസ് മീറ്റിന്റെ പ്രധാനവേദിയിലും ലാലേട്ടനെ കാണാന്‍ പോവുന്നുണ്ടെന്ന് പൃഥ്വിരാജ് പറഞ്ഞിരുന്നു.
കുഞ്ചാക്കോ ബോബനെ എടുത്ത് പൊക്കി ഉമ്മ നല്‍കുന്ന ടൊവിനോ തോമസിനെയും ഒപ്പം ന്നാ താന്‍ കേസ് കൊട് സിനിമ ഉറപ്പായും കാണുമെന്നും, ഡാന്‍സ് കാണാനെങ്കിലും സിനിമ കാണുമെന്ന് പറയുന്ന പൃഥ്വിയേയും വീഡിയോയില്‍ കാണാന്‍ കഴിയും. മൂവരും പരസ്പരം ആലിംഗനം ചെയ്താണ് മടങ്ങുന്നത്.
ന്നാ താന്‍ കേസ് കൊട് ഉറപ്പായും കാണുമെന്ന് പൃഥ്വിരാജ് പറയുമ്പോള്‍ നാളെ തന്റെ ചിത്രവും റിലീസാകുന്നുണ്ട് എന്ന് ടൊവിനോ പൃഥ്വിയോട് പറയുന്നതും വീഡിയോയില്‍ കാണാം.
