പൃഥ്വിരാജ് – സുരാജ് വെഞ്ഞാറമൂട് കോംബോയില്‍ സൂപ്പര്‍ഹിറ്റ് വിജയം രചിച്ച ഡ്രൈവിംഗ് ലൈസന്‍സിന് ശേഷം വമ്പന്‍ പ്രോജക്ടുമായി ലാല്‍ ജൂനിയര്‍ വീണ്ടും എത്തുന്നു.
ടോവിനോ തോമസ് നായകനാകുന്ന ഈ ചിത്രത്തില്‍ സൗബിനും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. മിന്നല്‍ മുരളി, തല്ലുമാല, അജയന്റെ രണ്ടാം മോഷണം തുടങ്ങിയ മെഗാ പ്രോജക്ടുകള്‍ക്ക് ശേഷം എത്തുന്ന ടോവിനോയുടെ മറ്റൊരു ബിഗ് ബഡ്ജറ്റ് ചിത്രം കൂടിയാണിത്. ചിത്രത്തിന്റെ ടൈറ്റിലും മറ്റു വിവരങ്ങളും ഉടന്‍ തന്നെ പുറത്തുവിടും.
കഴിഞ്ഞ ദിവസം പുറത്തിറങ്ങിയ ടോവിനോയുടെ മിന്നല്‍ മുരളി ട്രെയ്ലര്‍ പ്രേക്ഷകര്‍ക്കിടയില്‍ തരംഗമായിരിക്കുകയാണ്. ഡിസംബര്‍ 24ന് നെറ്റ്ഫ്‌ലിക്‌സിലൂടെയാണ് ചിത്രം എത്തുന്നത്.
ഡ്രൈവിംഗ് ലൈസന്‍സിന് ശേഷം ലാല്‍ ജൂനിയര്‍ ഒരുക്കുന്ന ടോവിനോ ചിത്രം ഫീല്‍ ഗുഡ് കൊമേഴ്‌സ്യല്‍ എന്റര്‍ടൈനര്‍ ഗണത്തില്‍പെടുന്ന ഒരു സിനിമയായിരിക്കും.
സ്റ്റാര്‍ എന്ന ചിത്രത്തിന് ശേഷം സുവിന്‍ സോമശേഖരന്‍ തിരക്കഥ ഒരുക്കുന്ന ചിത്രമാണിത്. ആല്‍ബിയാണ് ചിത്രത്തിനായി ക്യാമറ ചലിപ്പിക്കുന്നത്.
യക്‌സന്‍ നേഹ സംഗീതസംവിധാനം നിര്‍വഹിക്കുന്നു. ഡ്രൈവിംഗ് ലൈസന്‍സിന് ശേഷം ലാല്‍ ജൂനിയറും ലാലും ചേര്‍ന്ന് സുനാമി എന്നൊരു ചിത്രവും സംവിധാനം നിര്‍വഹിച്ചിരുന്നു.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
CONTENT HIGHLIGHTS: Lal Jr. is back with a mega project after getting his driving license movie