കൊച്ചി: യു.എ.ഇയുടെ പശ്ചാത്തലത്തില്‍ സംവിധാനം ചെയ്യുന്ന ചിത്രത്തിന് പേരിട്ടതായി സംവിധായകന്‍ ലാല്‍ ജോസ്. പേരിട്ട വിവരം അദ്ദേഹം തന്നെയാണ് ഫേസ്ബുക്കിലൂടെ ആരാധകരെ അറിയിച്ചത്. മ്യാവൂ എന്നാണ് ചിത്രത്തിന്റെ പേര്.
‘നമ്മുടെ സിനിമയ്ക്ക് പേരിട്ടു: മ്യാവൂ. പുതുവര്‍ഷത്തില്‍ തീയേറ്ററുകള്‍ വീണ്ടും തുറക്കുമെന്ന ഉറച്ച വിശ്വാസത്തോടെ പറയട്ടെ. ഈ പൂച്ചയെ വെള്ളിത്തിരയില്‍ കാണാം’, ലാല്‍ ജോസ് ഫേസ്ബുക്കിലെഴുതി
തോമസ് തിരുവല്ല ഫിലിംസിന്റെ ബാനറില്‍ പ്രവാസി വ്യവസായി തോമസ് തിരുവല്ലയാണ് ചിത്രം നിര്‍മിക്കുന്നത്. റാസല്‍ഖൈമയില്‍ ചിത്രത്തിന്റെ ഷൂട്ടിംഗ് പുരോഗമിക്കുകയാണ്.
സൗബിന്‍ ഷാഹിറും മംമ്ത മോഹന്‍ദാസും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു. ചിത്രത്തിന്റെ രചന നിര്‍വ്വഹിച്ചിരിക്കുന്നത് ഇക്ബാല്‍ കുറ്റിപ്പുറമാണ്.
ആലുവയിലെ പലചരക്ക് നടത്തിപ്പുകാരന്‍ ദസ്തഗീറിന്റെയും കുടുംബത്തിന്റെയും കഥപറയുന്ന ചിത്രമാണ് മ്യാവു. യാസ്മിന എന്ന റഷ്യന്‍ യുവതിയും ഒരു പൂച്ചയും ചിത്രത്തിലെ മറ്റൊരു പ്രധാന കഥാപാത്രത്തെ അവതരിപ്പിക്കുന്നു.
ഇവരെക്കൂടാതെ സലീം കുമാര്‍, ഹരിശ്രീ യൂസുഫ്, തുടങ്ങിയവരും ചിത്രത്തില്‍ അഭിനയിക്കുന്നു. അറബിക്കഥ, ഡയമണ്ട് നെക്‌ളേസ്, എന്നീ ചിത്രങ്ങള്‍ക്ക് ശേഷം യു.എ.ഇ പശ്ചാത്തലമാക്കി ലാല്‍ജോസ് ഒരുക്കുന്ന മൂന്നാമത്തെ ചിത്രമാണിത്.
