പത്തനംതിട്ട: തിരുവല്ല കാര്‍ഷിക വികസന ബാങ്ക് തെരഞ്ഞെടുപ്പില്‍ എല്‍.ഡി.എഫിന് വിജയം. തെരഞ്ഞെടുപ്പില്‍ മുന്‍ എം.എല്‍.എ ശിവദാസന്‍ നായരടക്കം യു.ഡി.എഫ് പാനലിലെ 13 സ്ഥാനാര്‍ത്ഥികളും തോറ്റു. പതിറ്റാണ്ടുകളായി കോണ്‍ഗ്രസ് ഭരിച്ചിരുന്ന സഹകരണ സ്ഥാപനമാണ് തിരുവല്ല കാര്‍ഷിക വികസന ബാങ്ക്.
തിരുവല്ല കാര്‍ഷിക വികസന ബാങ്കിലുണ്ടായ തോല്‍വി സംസ്ഥാന തലത്തില്‍ കാര്‍ഷിക സഹകരണ മേഖലയിലെ യു.ഡി.എഫിനുള്ള ഭരണം നഷ്ട്ടപെടുത്തുമെന്നാണ് വിലയിരുത്തല്‍. കഴിഞ്ഞ ദിവസം നടന്ന പത്തനംതിട്ട കാര്‍ഷിക ബാങ്കിലെ തെരഞ്ഞെടുപ്പിലും യു.ഡിഎഫ് തോല്‍വി ഏറ്റുവാങ്ങിയിരുന്നു.
വ്യാപകമായ കള്ളവോട്ട് നടക്കാന്‍ സാധ്യതയുണ്ടെന്ന് ചൂണ്ടിക്കാട്ടി മുന്‍ യു.ഡി.എഫ് ഭരണസമിതി ഹൈക്കോടതിയെ സമീപിച്ചിരുന്നു. തുടര്‍ന്ന് ജില്ലാ പൊലീസിന്റെ നേതൃത്വത്തില്‍ ബാങ്കിന്റെ പരിസരങ്ങളില്‍ കനത്ത സുരക്ഷയൊരുക്കിയിരുന്നു. പ്രധാന ഗേറ്റുകളിലടക്കം പുതിയ സി.സി.ടി.വി ക്യാമറകള്‍ സ്ഥാപിച്ചുകൊണ്ടാണ് തെരഞ്ഞെടുപ്പ് നടത്തിയത്.
