തിരുവനന്തപുരം: യൂണിവേഴ്സിറ്റി കോളേജില്‍ കഴിഞ്ഞ ദിവസം രൂപീകരിച്ച കെ.എസ്.യു യൂണിറ്റിന്റെ വൈസ് പ്രസിഡന്റ് സ്ഥാനം ഏറ്റെടുത്ത ആര്യയെന്ന വിദ്യാര്‍ത്ഥിയെ വാട്‌സ് ആപ്പ് ഗ്രൂപ്പുകളില്‍ നിന്നും പുറത്താക്കിയതായി പരാതി. സഹപാഠികള്‍ ഉള്‍പ്പെട്ട ഗ്രൂപ്പുകളില്‍ നിന്നാണ് ആര്യയെ പുറത്താക്കിയത്.
കെ.എസ്.യുവിന്റെ വൈസ് പ്രസിഡന്റ് സ്ഥാനം സ്വീകരിച്ചതിന് പിന്നാലെയായിരുന്നു നടപടി. എന്നാല്‍ ഇത്തരമൊരു നീക്കത്തിന് പിന്നില്‍ എസ്.എഫ്.ഐ ആണെന്നാണ് കെ.എസ്.യുവിന്റെ ആരോപണം.
ഭാരവാഹികളേയും കോളേജിലെ കെ.എസ്.യു പ്രവര്‍ത്തകരേയും മാനസികമായി തളര്‍ത്താനുള്ള എസ്.എഫ്.ഐയുടെ നീക്കമാണ് ഇതിന് പിന്നിലെന്ന് യൂണിറ്റ് പ്രസിഡന്റ് അമല്‍ ചന്ദ്രന്‍ പറഞ്ഞു.
എന്നാല്‍ സംഭവവുമായി ബന്ധപ്പെട്ട് എസ്.എഫ്.ഐയ്ക്ക് പങ്കുണ്ടോയെന്ന് അന്വേഷിക്കുമെന്ന് എസ്.എഫ്.ഐ ദേശീയ പ്രസിഡന്റ് വി.പി സാനു പ്രതികരിച്ചു. സംഭവത്തെ കുറിച്ച് അറിയില്ല. കാര്യങ്ങളുടെ നിജസ്ഥിതി അന്വേഷിക്കുമെന്നും സാനു പറഞ്ഞു.
ഇന്നലെയാണ് യൂണിവേഴ്സിറ്റി കോളജില്‍ കെ.എസ്.യു യൂണിറ്റ് രൂപീകരിച്ചത്. യൂണിവേഴ്സിറ്റി കോളജ് പ്രശ്നത്തില്‍ ജുഡീഷ്യല്‍ അന്വേഷണം ആവശ്യപ്പെട്ട് കെ.എസ്.യു സംസ്ഥാന പ്രസിഡന്റ് അഭിജിത്തിന്റെ നേതൃത്വത്തില്‍ സെക്രട്ടേറിയറ്റിനു മുന്നില്‍ നടത്തുന്ന അനിശ്ചിതകാല നിരാഹാര സമര വേദിയിലായിരുന്നു പ്രഖ്യാപനം.
ഏഴു പേരാണ് കമ്മിറ്റിയില്‍ ഉള്ളത്. 18 വര്‍ഷത്തിനുശേഷമാണ് ഇവിടെ കെ.എസ്.യു യൂണിറ്റ് രൂപീകരിക്കുന്നത്.
യൂണിവേഴ്സിറ്റി കോളജില്‍ ഒരു സംഘടന മതിയെന്ന എസ്.എഫ്.ഐ വാദം അംഗീകരിക്കാന്‍ കഴിയില്ലെന്നു കെ.എസ്.യു നേതൃത്വം പ്രതികരിച്ചിരുന്നു. ഭയം കാരണമാണ് മറ്റു സംഘടനകളിലേക്ക് കുട്ടികള്‍ വരാത്തതെന്നും കെ.എസ്.യു ആരോപിച്ചിരുന്നു.