ചോക്ലേറ്റ് പോലെ എന്തോ കൊടുത്ത് ബോധം കെടുത്തി; ജിതിന്‍ പൊലീസിന് മുന്നില്‍ കുറ്റസമ്മതം നടത്തിയെന്ന് പറയുന്നത് വസ്തുതാവിരുദ്ധം: കെ. സുധാകരന്‍
ഡൂള്‍ന്യൂസ് ഡെസ്‌ക്
Thursday, 22nd September 2022, 5:36 pm
തിരുവനന്തപുരം: എ.കെ.ജി സെന്റര്‍ ആക്രമണക്കേസില്‍ പൊലീസ് അറസ്റ്റ് ചെയ്ത യൂത്ത് കോണ്‍ഗ്രസ് പ്രവര്‍ത്തകന്‍ കുറ്റം സമ്മതിച്ചെന്ന വാര്‍ത്തക്ക് പിന്നാലെ പ്രതികരണവുമായി കെ.പി.സി.സി അധ്യക്ഷന്‍ കെ. സുധാകരന്‍.
ക്രൈംബ്രാഞ്ച് അറസ്റ്റ് ചെയ്ത യുവാവിനെ വിട്ടയച്ചില്ലെങ്കില്‍ നാളെ പൊലീസ് സ്റ്റേഷനിലേക്ക് മാര്‍ച്ച് നടത്തുമെന്ന് സുധാകരന്‍ പറഞ്ഞു.
അറസ്റ്റിലായ ജിതിന്‍ പൊലീസിന് മുന്നില്‍ കുറ്റസമ്മതം നടത്തിയെന്ന് പറയുന്നത് വസ്തുതാ വിരുദ്ധമാണെന്നും അങ്ങനെ ചെയ്‌തെങ്കില്‍ അത് അവര്‍(പൊലീസ്)ചോക്ലേറ്റ് പോലെ എന്തോ കൊടുത്ത് ബോധമനസിനെ കെടുത്തി പറയിച്ചതാണെന്നും സുധാകരന്‍ പറഞ്ഞു.
‘തീക്കൊള്ളി കൊണ്ട് തല ചൊറിയരുത്. കോണ്‍ഗ്രസ് ഒരുപാട് ക്ഷമിക്കും, അതിരുവിട്ടാല്‍ നിയമം കയ്യിലെടുക്കും. ഭരണകക്ഷി ആ അപകടകരമായ സാഹചര്യത്ത അഭിമുഖീകരിക്കേണ്ടി വരും,’ സുധാകരന്‍ പറഞ്ഞു.
