കോഴിക്കോട് അതിഥി തൊഴിലാളിയെ ബൈക്കില്‍ വലിച്ചിഴച്ച് കവര്‍ച്ചയ്‌ക്കെത്തിയ സംഘം; പ്രതികള്‍ പിടിയില്‍
ഡൂള്‍ന്യൂസ് ഡെസ്‌ക്
Friday, 2nd July 2021, 7:56 pm
കോഴിക്കോട്: എളേറ്റില്‍ അതിഥി തൊഴിലാളിയെ ബൈക്കില്‍ വലിച്ചിഴച്ച് കവര്‍ച്ചക്കെത്തിയ സംഘം. ഇയ്യാട് താമസിക്കുന്ന ബിഹാര്‍ സ്വദേശി അലി അക്ബറിനെയാണ് മൊബൈല്‍ കവര്‍ച്ചയ്‌ക്കെത്തിയ സംഘം ബൈക്കില്‍ വലിച്ചിഴച്ചത്.
സംഭവത്തില്‍ രണ്ടു പേരെ കൊടുവള്ളി പൊലീസ് കസ്റ്റഡിയിലെടുത്തിട്ടുണ്ട്. കാക്കൂര്‍ സ്വദേശികളായ സനു കൃഷ്ണന്‍, ഷംനാസ് എന്നിവരാണ് പിടിയിലായത്.
ബൈക്കിലെത്തിയ രണ്ടംഗ സംഘം റോഡില്‍ നില്‍ക്കുകയായിരുന്ന അലി അക്ബറിനോട് ഫോണ്‍ വിളിക്കാനെന്ന വ്യാജേന മൊബൈല്‍ ഫോണ്‍ വാങ്ങിക്കുകയായിരുന്നു. തുടര്‍ന്ന് ഫോണ്‍ വിളിക്കുന്നതായി അഭിനയിക്കുകയും ബൈക്ക് മുന്നോട്ട് എടുത്ത് പോവുകയും ചെയ്തു.
എന്നാല്‍ ബൈക്കില്‍ പിടിച്ചു നില്‍ക്കുകയായിരുന്ന അലി അക്ബര്‍ പിടി വിട്ടില്ല. തുടര്‍ന്ന് മോഷ്ടാക്കള്‍ ഇയാളെയും വലിച്ചിഴച്ച് ബൈക്ക് ഓടിച്ച് പോവുകയായിരുന്നു.
