തിരുവനന്തപുരം: കമ്യൂണിസ്റ്റ് രാഷ്ട്രീയം തങ്ങളെ പഠിപ്പിക്കാന്‍ എളമരം കരീം വളര്‍ന്നിട്ടില്ലെന്ന് കെ.കെ. രമ എം.എല്‍.എ. കരീമിന്റെ ചരിത്രം പറയിപ്പിക്കരുതെന്നും കരാര്‍ തൊഴിലാളിയില്‍ നിന്ന് കരീം എങ്ങനെ ഇവിടെയെത്തിയെന്നും രമ ചോദിച്ചു. തനിക്കെതിരായ എളമരം കരീമിന്റെ ആരോപണങ്ങള്‍ക്ക് ഏഷ്യാനെറ്റ് ന്യൂസിലെ ന്യൂസ് അവറില്‍ മറുപടി പറയുകയായിരുന്നു കെ.കെ. രമ.
രക്തസാക്ഷികളെയും പതാകയെയും ഒറ്റുകൊടുത്തത് സി.പി.ഐ.എമ്മാണ്. ഭീഷണി പുത്തരിയില്ല, അവസാന ശ്വാസം വരെ പോരാടും. കൊന്നിട്ടും വെട്ടിനുറുക്കിയിട്ടും തീരാത്ത പകയാണ് സി.പിഐ.എമ്മിന്. കച്ചവട രാഷ്ട്രീയമില്ലാതെ എം.എല്‍.എ ആയതില്‍ തനിക്ക് അഭിമാനമുണ്ടെന്നു രമ പറഞ്ഞു.
എളമരം കരീമിന്റെ വലിയ നേതാവ് പിണറായി വിജയന്‍ ഒഞ്ചിയത്ത് വന്ന് ഞങ്ങളെ തീര്‍ക്കുമെന്ന് പ്രസംഗിച്ചതാണ്. ഭീഷണിയല്‍ വീണുപോകുന്നവരല്ല ഒഞ്ചിയത്തുള്ള കമ്യൂണിസ്റ്റുകാര്‍. അവസാനത്തെ ശ്വാസം വരെയും പോരാട്ടം തുടരും. രാഷ്ട്രീയ പ്രവര്‍ത്തനവുമായി മുന്നോട്ട് പോകാന്‍ ഒരു ആശങ്കയുമില്ലെന്നും കെ.കെ. രമ പറഞ്ഞു.
അതേസമയം, കെ.കെ.രമയുടെ എം.എല്‍.എ സ്ഥാനം പ്രസ്ഥാനത്തെ ഒറ്റുകൊടുത്തതിനുള്ള പാരിതോഷികമെന്നായിരുന്നു എളമരം കരീമിന്റെ പ്രതികരണം. വടകര ഒഞ്ചിയത്ത് ഇക്കഴിഞ്ഞ ചൊവ്വാഴ്ച സി.പി.ഐ.എം സംഘടിപ്പിച്ച സി.എച്ച്. അശോകന്‍ അനുസ്മരണ ചടങ്ങിലായിരുന്നു കരീമിന്റെ പരാമര്‍ശം.
