പ്രതിഷേധം അതിരുകടന്നു; അമ്പയര്‍ക്കെതിരെ പ്രതിഷേധിച്ച കീറണ്‍ പൊള്ളാര്‍ഡിനെതിരെ നടപടി
ഹൈദരാബാദ്: ഐ.പി.എല്ലിലെ ചെന്നൈയ്ക്കെതിരെയുള്ള കലാശപ്പോരില്‍ വൈഡ് വിളിക്കാത്ത അമ്പയര്‍ നടപടിയില്‍ പ്രതിഷേധിച്ച കീറണ്‍ പൊള്ളാര്‍ഡിന് പിഴ. മാച്ച് ഫീയുടെ 25 ശതമാനമാണ് പിഴയായി വിധിച്ചത്.
ഐ.പി.എല്‍ കോഡ് ഓഫ് കോണ്ടാക്ട് പ്രകാരമണ് പൊള്ളാര്‍ഡിന് പിഴ ശിക്ഷ ചുമത്തിയത്. കഴിഞ്ഞ ദിവസം നടന്ന ഫൈനലില്‍ മുംബൈ ഇന്നിങ്‌സിലെ അവസാന ഓവറിലായിരുന്നു സംഭവം.
ബ്രാവോ എറിഞ്ഞ അവസാന ഓവറിലെ മൂന്നാം പന്ത് വൈഡ് ക്രീസിന് പുറത്ത് കൂടെയാണ് പോയതെങ്കിലും അമ്പയര്‍ വൈഡ് വിളിച്ചില്ല. ഇതോടെ ദേഷ്യം നിയന്ത്രിക്കാനാകാതെ പൊള്ളാര്‍ഡ് ബാറ്റ് മുകളിലേക്ക് എറിഞ്ഞു. കൂടാതെ അടുത്ത പന്ത് ബ്രാവോ എറിയാന്‍ തുടങ്ങിയപ്പോള്‍ ക്രീസില്‍ നിന്ന് മാറിക്കളയുകയും ചെയ്തിരുന്നു.
