ഉമിനീര് കൊണ്ട് ലഹരി പരിശോധന; മദ്യപിച്ച് വാഹനമോടിക്കുന്നവരെ പൊക്കാന്‍ ആല്‍കോ സ്‌കാന്‍ വാനുമായി കേരള പൊലീസ്
ഡൂള്‍ന്യൂസ് ഡെസ്‌ക്
Monday, 29th August 2022, 8:48 pm
തിരുവനന്തപുരം: മദ്യപിച്ച് വാഹനമോടിക്കുന്നവരെ പിടികൂടാന്‍ പുത്തന്‍ സംവിധാനവുമായി കേരള പൊലീസ്. മദ്യപിച്ച് വാഹനമോടിച്ചുണ്ടാകുന്ന അപകടങ്ങള്‍ തടയുന്നതിന് ആല്‍കോ സ്‌കാന്‍ വാനുമായാണ് കേരള പൊലീസ് എത്തിയിരിക്കുന്നത്. പൊലീസിന്റെ വാഹന പരിശോധനയ്ക്ക് സഹായകരമാകുന്നതാണ് ആല്‍കോ സ്‌കാന്‍ വാന്‍.
വാഹന പരിശോധന നടത്തുന്ന സമയത്ത് തന്നെ മദ്യമോ മറ്റു ലഹരിവസ്തുക്കളോ ഉപയോഗിച്ചിട്ടുണ്ടോ എന്നുള്ള പരിശോധനയും മെഡിക്കല്‍ സെന്ററില്‍ കൊണ്ടുപോകാതെ ഈ വാനില്‍ വെച്ച് തന്നെ വേഗത്തില്‍ നടത്താനാകുമെന്ന് പൊലീസ് പറഞ്ഞു.
ഉമിനീര് ഉപയോഗിച്ചുള്ള ഈ പരിശോധന രാജ്യത്ത് തന്നെ ആദ്യമായാണ് നടപ്പാക്കുന്നത്. വിദേശ രാജ്യങ്ങളിലെ പൊലീസ് ഉപയോഗിക്കുന്ന തരത്തിലുള്ള ഈ വാഹനം എല്ലാ ജില്ലകളിലും നല്‍കാനാണ് പദ്ധതി.
