കേരളാ പൊലീസിന്റെ പേജിലൂടെ പുറത്തു വിട്ട ഒരു വീഡിയോ ആണ് ഇപ്പോള്‍ സോഷ്യല്‍ മീഡിയയിലെ പ്രധാന ചര്‍ച്ചാ വിഷയം. പൊലീസിന്റെ സേവനം ഏതു നിമിഷം ലഭ്യമാവുന്നതിന്റെ ഭാഗമായുള്ള 112 എന്ന എമര്‍ജന്‍സി ഹെല്‍പ് ലൈന്‍ നമ്പറിന്റെ പ്രചരണാര്‍ത്ഥം പുറത്തു വിട്ട വീഡിയോ ആണ് തരംഗമായിക്കൊണ്ടിരിക്കുന്നത്.
26 സെക്കന്റ് ദൈര്‍ഘ്യമുള്ള വീഡിയോയില്‍ സര്‍വം ഇളയ ദളപതി വിജയ് മയമാണ്.
വിജയ്‌യുടെ പോക്കിരി എന്ന ചിത്രത്തില്‍ അസിന്‍ അവതരിപ്പിച്ച നായികാ കഥാപാത്രത്തെ ഗുണ്ടകള്‍ ഉപദ്രവിക്കുന്നതും, അനിയന്‍ ചെറുക്കന്‍ 112ല്‍ വിളിക്കുന്നതും വിളി കേട്ട മാത്രയില്‍ പൊലീസെത്തുന്നതുമാണ് വീഡിയോയിലുള്ളത്.
തെരി എന്ന വിജയ് ചിത്രത്തിലെ വിജയ് കുമാര്‍ എന്ന കഥാപാത്രമാണ് വിളി കേട്ട് സ്‌പോട്ടിലെത്തുന്നത്. ഇതിനെല്ലാം അകമ്പടി നല്‍കുന്നതാകട്ടെ, പുതിയ വിജയ് ചിത്രം ബീസ്റ്റിലെ അറബിക് കുത്തും.
വീഡിയോയ്ക്ക് പിന്നാലെ കമന്റുകളുമായി നിരവധി ആരാധകരും എത്തുന്നുണ്ട്. ‘ഇത് വെറും പൊലീസല്ല, പോക്കിരി പൊലീസ്’ ‘കേരള പൊലീസില്‍ ഏതോ വിജയ് രസികന്‍ കയറിപ്പറ്റിയിട്ടുണ്ട്’ ‘ഓള്‍ കേരള വിജയ് ഫാന്‍സ് ആന്‍ഡ് വെല്‍ഫെയര്‍ അസോസിയേഷന്‍ കേരള പൊലീസ് ഘടകം’ തുടങ്ങിയ കമന്റുകളാണ് വീഡിയോയ്ക്ക് പിന്നാലെ എത്തുന്നത്.
ആദ്യമായല്ല കേരള പൊലീസ് ഇത്തരത്തിലുള്ള വീഡിയോ പങ്കുവെക്കുന്നത്. മിന്നല്‍ മുരളി പുറത്തിറങ്ങിയ സമയത്ത് റോഡ് സേഫ്റ്റി സംബന്ധിച്ച ബോധവത്കരണ വീഡിയോ പുറത്തിറക്കിയിരുന്നു.
കൊവിഡ് ഭീതിയുടെ സമയത്ത് അയ്യപ്പനും കോശിയും എന്ന ചിത്രത്തിലെ കലക്കാത്ത എന്ന പാട്ടിനൊപ്പം ചുവടുവെച്ച് എസ്.എം.എസ് എന്നതിനെ കുറിച്ചുള്ള ബോധവത്കരണ വീഡിയോ അന്താരാഷ്ട്ര തലത്തില്‍ പോലും ചര്‍ച്ചയായിരുന്നു.
Content Highlight: Kerala Police new video