ആലപ്പുഴ: കനത്ത മഴയെ തുടര്‍ന്ന് ക്ഷേത്രവും പരിസരവും ഒന്നാകെ മുങ്ങിയപ്പോള്‍ ചെമ്പില്‍ യാത്ര ചെയ്ത് എത്തി താലികെട്ടേണ്ടി വന്നിരിക്കുകയാണ് ആലപ്പുഴയിലെ വധൂവരന്‍മാര്‍ക്ക്.
തകഴി സ്വദേശിയായ ആകാശും അമ്പലപ്പുഴ സ്വദേശിയായ ഐശ്വര്യയുമാണ് വിവാഹമണ്ഡപത്തിലേക്ക് ചെമ്പില്‍ കയറി എത്തിയത്.
തലവടി പനയന്നൂര്‍ക്കാവ് ക്ഷേത്രത്തില്‍ വെച്ചായിരുന്നു ഇവരുടെ താലികെട്ട്.
ഈ ക്ഷേത്രത്തില്‍ തന്നെ വിവാഹം നടത്തണമെന്ന് ഇവരുടെ ആഗ്രഹമായിരുന്നു. സമീപത്തെ ജങ്ഷന്‍ വരെ കാറിലെത്തിയ ഇവരെ ക്ഷേത്രത്തിലേക്ക് എത്തിക്കാനായി ക്ഷേത്ര ഭാരവാഹികള്‍ തന്നെ വലിയ ചെമ്പ് ഏര്‍പ്പാടാക്കി.
കാറില്‍ നിന്നും ഇറങ്ങി ചെമ്പില്‍ കയറിയ വധൂവരന്മാരെ ക്ഷേത്രത്തിലെ മണ്ഡപം വരെ ഭാരവാഹികള്‍ കൊണ്ടുവന്നു. താലിക്കെട്ടിന് ശേഷം ചെമ്പില്‍ ഇരുന്നുകൊണ്ട് തന്നെയാണ് ക്ഷേത്രത്തില്‍ ദര്‍ശനം നടത്തിയത്. ക്ഷേത്രത്തിലേക്കുള്ള റോഡിലും മുട്ടോളം വെള്ളമുണ്ടായിരുന്നു.
ക്ഷേത്രത്തില്‍ വെച്ച് കല്യാണം കഴിക്കണമെന്നത് തങ്ങളുടെ ആഗ്രഹമായിരുന്നുവെന്ന് ആകാശ് പറയുന്നു. അതുകൊണ്ടാണ് പ്രതിബന്ധങ്ങളെല്ലാം അവഗണിച്ച് ക്ഷേത്രത്തില്‍ ചെമ്പില്‍ എത്താന്‍ തീരുമാനിച്ചതെന്നും ആകാശ് പറയുന്നു. ഇരുവരുടേയും പ്രണയവിവാഹമാണ്. സ്വകാര്യ ആശുപത്രിയിലെ ആരോഗ്യപ്രവര്‍ത്തകരാണ് ഇരുവരും.
മണിമലയാറും പമ്പയും സംഗമിക്കുന്ന പ്രദേശമാണ് തലവടി. കിഴക്കന്‍ പ്രദേശങ്ങളില്‍ നിന്ന് വെള്ളം ഒഴുകി എത്തിയതാണ് തലവടിയില്‍ വെള്ളക്കെട്ട് രൂക്ഷമാകാന്‍ കാരണം.
ഞായറാഴ്ച പകല്‍ കാര്യമായി മഴ പെയ്തില്ലെങ്കിലും ആലപ്പുഴ ജില്ലയിലെ നദികളിലേക്കു കിഴക്കന്‍വെള്ളത്തിന്റെ വരവു ശക്തമായിട്ടുണ്ട്. കുട്ടനാട്ടിലും അപ്പര്‍കുട്ടനാട്ടിലുമടക്കം താഴ്ന്ന പ്രദേശങ്ങളെല്ലാം വെള്ളത്തിലാണ്.
എടത്വാ, തലവടി, മുട്ടാര്‍, നീരേറ്റുപുറം ഭാഗങ്ങള്‍ വെള്ളപ്പൊക്കക്കെടുതിയിലാണ്. വീടുകളില്‍ വെള്ളംകയറിയതു ജനജീവിതം ദുരിതത്തിലാക്കി.
അപ്പര്‍കുട്ടനാട്ടില്‍ ആയിരത്തിലധികം വീടുകളില്‍ വെള്ളം കയറിയിട്ടുണ്ട്. ഒട്ടേറെ വീടുകള്‍ വെള്ളപ്പൊക്ക ഭീഷണിയിലാണ്.
