കോട്ടയം: കേരള കോണ്‍ഗ്രസ് (ജേക്കബ്) ജോണി നെല്ലൂര്‍ വിഭാഗം കേരള കോണ്‍ഗ്രസ് (എം) ജോസഫ് വിഭാഗത്തില്‍ ലയിച്ചു. ഉപാധികളില്ലാതെയാണ് ലയനമെന്ന് ജോണി നെല്ലൂര്‍ പറഞ്ഞു. അനൂപ് ജേക്കബ് തന്നെ പുറത്താക്കി എന്ന പ്രസ്താവന ഈ വര്‍ഷത്തെ ഏറ്റവും വലിയ തമാശയാണെന്നും ജോണി നെല്ലൂര്‍ പറഞ്ഞു.
‘മിന്നുന്നതെല്ലാം പൊന്നല്ല എന്ന് അനൂപ് ജേക്കബ് ഉടന്‍ തിരിച്ചറിയും. അനൂപിനെ കേരള കോണ്‍ഗ്രസ് എമ്മിലേക്ക് ക്ഷണിക്കുകയാണ്’, ജോണി നെല്ലൂര്‍ പറഞ്ഞു.
കേള കോണ്‍ഗ്രസുകളുടെ യോജിപ്പിനുള്ള തുടക്കമാണ് ഈ ലയനമെന്നും അനൂപ് ജേക്കബും ജോസ് കെ മാണിയുമെല്ലാം വൈകാതെ തങ്ങള്‍ക്കൊപ്പം വരേണ്ടി വരുമെന്നും ലയന സമ്മേളനം ഉദ്ഘാടനം ചെയ്തുകൊണ്ട് ജോണി നെല്ലൂര്‍ പറഞ്ഞു.
ജോസഫ് വിഭാഗത്തില്‍ ലയിക്കുന്നതുമായി ബന്ധപ്പെട്ട് ജേക്കബ് വിഭാഗത്തില്‍ തര്‍ക്കമുണ്ടായിരുന്നു. ഇത് വിള്ളലിലേക്ക് നയിക്കുകയായിരുന്നു. ലയനത്തെ ആദ്യഘട്ടത്തില്‍ അനൂപ് ജേക്കബ് അനുകൂലിച്ചിരുന്നെങ്കിലും പിന്നീട് തീരുമാനം മാറ്റുകയായിരുന്നു. ഇതിനെയും ജോണി നെല്ലൂര്‍ വിമര്‍ശിച്ചു. പാര്‍ട്ടിയെ ഒറ്റുകൊടുക്കാന്‍ അനൂപ് അച്ചാരം വാങ്ങിയെന്നാണ് ജോണി നെല്ലൂര്‍ പറഞ്ഞത്.
