കൊച്ചി ഐ.എസ്.എല്‍ നാലാം സീസണില്‍ കേരളാ ബ്ലാസ്‌റ്റേഴ്‌സിനു ആദ്യ ജയം. സീസണിലെ അഞ്ചാം മത്സരത്തിലാണ് മലയാളിത്താരം സി.കെ വിനീതിന്റെ ഗോളിലൂടെ കേരളം ആദ്യ ജയം സ്വന്തമാക്കിയത്. ആദ്യ പകുതിയില്‍ത്തന്നെ പത്തുപേരായി ചുരുങ്ങിയെങ്കിലും അവാസന നിമിഷം വരെ ഇഞ്ചോടിഞ്ച് പോരാട്ടമാണ് നോര്‍ത്ത് ഈസ്റ്റ് യൂണൈറ്റഡ് കാഴ്ചവെച്ചത്.
മത്സരത്തിന്റെ 24 ാം മിനിട്ടിലാണ് വിനീത് ഗോള്‍ നേടിയത്. മലയാളി താരം റിനോ ആന്റോയുടെ പാസില്‍ നിന്നാണ് കൊച്ചിയെ ആവേശത്തിലാഴ്ത്തിയ ഗോള്‍ വിനീത് കണ്ടെത്തിയത്. വലതു വിങ്ങില്‍ നിന്ന റിനോ നല്‍കിയ പാസിനെ ഡൈവിങ് ഹെഡറിലൂടെയായിരുന്നു വിനീത് ലക്ഷ്യത്തിലെത്തിച്ചത്.
വിനീതിന്റെ ഗോളിനു പിന്നാലെ സിഫ്നിയോസിന്റെ മുന്നേറ്റം ബോക്സില്‍ തടയാന്‍ ശ്രമിച്ച നോര്‍ത്ത ഈസ്റ്റ് ഗോള്‍കീപ്പര്‍ ടി.പി രഹ്നേഷ് ചുവപ്പ് കാര്‍ഡ് കണ്ട് പുറത്തായിരുന്നു. തുടര്‍ന്ന് മുന്നേറ്റതാരം നര്‍സാറിയെ മാറ്റി രണ്ടാം ഗോള്‍കീപ്പര്‍ രവി കുമാറിനെ കളത്തിലിറക്കാന്‍ നോര്‍ത്ത് ഈസ്റ്റ് ബ്ലാസ്‌റ്റേഴ്‌സിനെ നേരിട്ടത്.
സീസണില്‍ തന്റെ ആദ്യ ഗോളാണ് വിനീത് നേടിയ്ത. കഴിഞ്ഞ സീസണില്‍ അഞ്ച് ഗോളുകളുകളുമായി ടോപ്പ് ഇന്ത്യന്‍ ഗോള്‍ സ്‌കോററായിരുന്നു വിനീത്. കഴിഞ്ഞ മൂന്നു മത്സരങ്ങള്‍ സമനിലയില്‍ പിരിഞ്ഞപ്പോള്‍ ഗോവയോട് കേരളം 5-2 ന്റെ തോല്‍വി ഏറ്റുവാങ്ങിയിരുന്നു.
കൊച്ചിയില്‍ കേരളത്തിന്റെ മത്സരം കാണാന്‍ ടീമിന്റെ സഹ ഉടമകളിലൊരാളായ സച്ചിന്‍ ടെന്‍ഡുല്‍ക്കറും എത്തിയിരുന്നു.