ഇന്ത്യന്‍ സൂപ്പര്‍ ലീഗില്‍ തങ്ങളുടെ അടുത്ത മത്സരത്തിനിറങ്ങുന്ന കേരളാ ബ്ലാസ്റ്റേഴ്സ് സര്‍വ സജ്ജമായിട്ടാവും കളത്തിലിറങ്ങുക എന്നാണ് റിപ്പോര്‍ട്ടുകള്‍ വ്യക്തമാക്കുന്നത്. ടീമിന്റെ പരിശീലന സെഷനുകളും വ്യക്തമാക്കുന്നത് ഇക്കാര്യം തന്നെയാണ്.
കൊവിഡ് പിടിച്ചുലച്ചതിനാലും അവശ്യമായ തന്ത്രങ്ങള്‍ മെനയാനുള്ള കൃത്യമായ സാവകാശം ലഭിക്കാഞ്ഞതും ടീമിന്റെ പ്രകടനത്തെ ബാധിച്ചിരുന്നു. അന്ന് കളി മറന്നെങ്കിലും ഇനിയങ്ങോട്ട് കൊമ്പന്‍മാര്‍ കലിപ്പടക്കല്‍ മോഡിലേക്ക് തിരിച്ചെത്തുമെന്നാണ് ആരാധകരുടെ വിശ്വാസം.
കേരള ബ്ലാസ്റ്റേഴ്സിന്റെ ബയോ സെക്യൂര്‍ ബബിളില്‍ കൊവിഡ് വ്യാപനമുണ്ടായതിനെ തുടര്‍ന്ന് ടീം മുഴുവന്‍ ക്വാറന്റൈനിലായിരുന്നു. പരിശീലനത്തിനിറങ്ങാനോ ജിം ഉപയോഗിക്കാനോ വീഡിയോ ഫുട്ടേജുകള്‍ കണ്ട് തന്ത്രങ്ങള്‍ മെനയാനോ ബ്ലാസ്റ്റേഴ്‌സിനോ വുകോമനൊവിച്ചിനോ കഴിഞ്ഞിരുന്നില്ല.
ഒഡീഷയ്ക്കെതിരായ 2-0 ജയത്തിനു പിന്നാലെ കൊവിഡ് വ്യാപനമുണ്ടായതോടെ ബ്ലാസ്റ്റേഴ്സിന്റെ രണ്ട് മത്സരങ്ങളും മാറ്റി വെച്ചിരുന്നു. മുംബൈ സിറ്റി എഫ്.സിയ്ക്കും എ.ടി.കെ മോഹന്‍ ബഗാനുമെതിരായ മത്സരങ്ങളാണ് മാറ്റി വെച്ചത്.
