മലയാള സിനിമകളിലൂടെ ബാലതാരമായി എത്തിയ നടിയാണ് കീര്‍ത്തി സുരേഷ്. നടി മേനകയുടെയും നിര്‍മാതാവായ സുരേഷിന്റെയും മകളാണ് കീര്‍ത്തി. പ്രിയദര്‍ശന്റെ സംവിധാനത്തില്‍ എത്തിയ ഗീതാഞ്ജലിയിലാണ് ആദ്യമായി കീര്‍ത്തി നായികയായി അഭിനയിക്കുന്നത്.
അതിനുശേഷം മലയാളത്തിലും തമിഴിലും തെലുങ്കിലുമായി നിരവധി മികച്ച സിനിമകളില്‍ അഭിനയിക്കാന്‍ നടിക്ക് സാധിച്ചിരുന്നു. ബോളിവുഡിലും അഭിനയിച്ച കീര്‍ത്തി സുരേഷ് തമിഴില്‍ മിക്ക നടന്മാരുടെ കൂടെയും അഭിനയിച്ചിട്ടുണ്ട്.
ഇപ്പോള്‍ നാന സിനിമാവാരികക്ക് നല്‍കിയ അഭിമുഖത്തില്‍ നടന്‍ വിശാലിനെ കുറിച്ചും സൂര്യയെ കുറിച്ചും പറയുകയാണ് കീര്‍ത്തി. വിശാല്‍ ഉത്തരവാദിത്വ ബോധമുള്ള നടനാണെന്നും സൂര്യ എപ്പോഴും ശാന്തനാണെന്നുമാണ് നടി പറയുന്നത്.
‘വിശാല്‍ ഉത്തരവാദിത്വ ബോധമുള്ള ഒരു നടനാണ്. രാത്രി പകല്‍ എന്നില്ലാതെ ഷൂട്ടിങ്ങ് നടന്നാലും അദ്ദേഹത്തെ സൈറ്റില്‍ ക്ഷീണിതനായി കാണാനാവില്ല. എപ്പോഴും ഊര്‍ജ്ജസ്വലനായിരിക്കും. സൂര്യയെ കുറിച്ച് പറഞ്ഞാല്‍, അദ്ദേഹം അധികം സംസാരിക്കില്ല. എപ്പോഴും ശാന്തനാണ്,’ കീര്‍ത്തി സുരേഷ് പറയുന്നു.
നടന്‍ വിജയ്‌യെ കുറിച്ചും കീര്‍ത്തി അഭിമുഖത്തില്‍ സംസാരിച്ചു. പുറത്ത് എങ്ങനെയാണോ അതുപോലെ തന്നെയാണ് വിജയ് സ്വന്തം ജീവിതത്തിലുമെന്നാണ് നടി പറയുന്നത്. ശാന്തതയുടെ മറുപേരാണ് വിജയ് എന്നും കീര്‍ത്തി കൂട്ടിച്ചേര്‍ത്തു.
‘ഞാന്‍ വിജയ് സാറിന്റെ ആരാധികയാണ്. ചെറുപ്പത്തില്‍ ‘പോക്കിരി’ എന്ന സിനിമയുടെ നൂറാം ദിവസ ആഘോഷവേളയിലാണ് ഞാന്‍ ആദ്യമായി അദ്ദേഹത്തെ നേരില്‍ കാണുന്നത്. പുറത്ത് എങ്ങനെയാണോ അതുപോലെ തന്നെയാണ് വിജയ് സാര്‍ സ്വന്തം ജീവിതത്തിലും.
ശാന്തതയുടെ മറുപേരാണ് വിജയ്. പക്ഷേ ചിലപ്പോള്‍ അദ്ദേഹം പറയുന്ന തമാശകള്‍ കേട്ടാല്‍ ‘ഇദ്ദേഹമാണോ ഇങ്ങനെ സംസാരിക്കുന്നത്, തമാശ പറയുന്നത്’ എന്ന് അത്ഭുതം ജനിപ്പിക്കുകയും ചെയ്യും,’ കീര്‍ത്തി സുരേഷ് പറഞ്ഞു.
Content Highlight: Keerthy Suresh Talks About Vishal
